kai lamhe

tumheñ ma.alūm hai jab bhī

purāne yaar

galiyoñ kī

yūñhī be-sūd bātoñ meñ

ka.ī ghanToñ kī

be-masraf

nashist-e-rā.egāñ ko

yaad karte haiñ

to kitnā lutf aatā hai

purāne ghar meñ guzre pal

aur un meñ

sab kahī aur an-kahī

bātoñ ko jab dohrāyā jaatā hai

to kitnā lutf aatā hai

tumheñ ma.alūm hai jab is tarah ke

an-ginat lamhe

jinheñ ham yaad karte haiñ

jinheñ ham DhūñDte haiñ

zindagī kī har udāsī meñ

muqayyad haiñ ghaḌī ke ain markaz meñ

ravāñ in sūiyoñ kī

be-sila be-kār harakat meñ

tumheñ ma.alūm hai jab bhī mujhe in kī zarūrat thī

to maiñ ne vaqt se

in āḳhirī ayyām meñ itnī guzārish kī

mujhe de do vo sab lamhe

ki ab in kī zarūrat hai

to vo mujh se yahī kahtā

ka.ī lamhe

kalā.iyoñ par bañdhī ghaḌiyoñ se bāhar haiñ

unheñ maiñ kaise vāpas duuñ

unheñ maiñ kaise lauTā duuñ

tumhein malum hai jab bhi

purane yar

galiyon ki

yunhi be-sud baaton mein

kai ghanTon ki

be-masraf

nashist-e-raegan ko

yaad karte hain

to kitna lutf aata hai

purane ghar mein guzre pal

aur un mein

sab kahi aur an-kahi

baaton ko jab dohraya jata hai

to kitna lutf aata hai

tumhein malum hai jab is tarah ke

an-ginat lamhe

jinhen hum yaad karte hain

jinhen hum DhunDte hain

zindagi ki har udasi mein

muqayyad hain ghaDi ke ain markaz mein

rawan in suiyon ki

be-sila be-kar harakat mein

tumhein malum hai jab bhi mujhe in ki zarurat thi

to main ne waqt se

in aaKHiri ayyam mein itni guzarish ki

mujhe de do wo sab lamhe

ki ab in ki zarurat hai

to wo mujh se yahi kahta

kai lamhe

kalaiyon par bandhi ghaDiyon se bahar hain

unhen main kaise wapas dun

unhen main kaise lauTa dun