kaise Tahalta hai chand

kaise Tahaltā hai chāñd āsmān pe

jaise zabt kī pahlī manzil

āvāz ke alāva bhī insān hai

āñkhoñ ko chhū lene kī qīmat pe udaas mat ho

qabr kī sharm abhī baaqī hai

hañsī hamārī maut kī shahādat hai

lahad meñ paidā hone vaale bachche

hamārī maañ aañkh hai

qabr to miTTī kā makr hai

phir parinde sūraj se pahle kisī kā zikr karte haiñ

āvāz ke alāva bhī insān hai

TuuTe ho

zarā aur lahū añgār karo

ki maiñ ek be-libās aurat huuñ

aur jitnī chāhūñ āñkheñ rakhtī huuñ

maiñ ne āvāz ko tarāshā hai

hai koī merā mujassama banāne vaalā

apnī qismat pe udaas mat ho

maut kī sharm abhī baaqī hai

mujhe chādar dene vaale

tujhe hayā tak dukh lag jaa.eñ

mujhe lafz dene vaale

kaash aurat bhī janāze ko kāñdhā de saktī

har qadam zanjīr ma.alūm ho rahā hai aur merā dil tah kar ke rakh diyā

gayā hai shor mujhe lahūluhān kar rahā hai maiñ

apnī qaid kaaT rahī huuñ aur is qaid meñ kabhī

haath kaaT kar pheñk detī huuñ kabhī

āvāz kaaT kaaT kar pheñk rahī huuñ

merā dil daldal meñ rahne vaalā kiiḌā hai aur maiñ qabr se

dhutkārī huī laash

saḌāñdī hī saḌāñd se merī āñkhoñ kā

zā.iqa bad-rūh ho rahā hai

aur maiñ insān kī pahlī aur āḳhirī ġhalatī par dum hilā.e

bhauñktī jā rahī huuñ

maiñ jab insān thī to chor kī aas tak na thī maiñ

āñkhoñ meñ salīb aur dil meñ apnī laash

liye phirtī huuñ

sachchā.iyoñ ke zahr se marī huuñ

lekin duniyā gorkan ko DhūñDhne ga.ī huī hai

vo mujhe ābād kartā hai aur ābād kahtā hai

maiñ harī-bharī pyaas se zarḳhez ho jaatī huuñ

aur phūloñ ko miTTī meñ dabāne lagtī huuñ

dard mere azhdahe kā naam hai

aur saañp kī bhuuk merā ghar hai

kaise Tahalta hai chand aasman pe

jaise zabt ki pahli manzil

aawaz ke alawa bhi insan hai

aankhon ko chhu lene ki qimat pe udas mat ho

qabr ki sharm abhi baqi hai

hansi hamari maut ki shahadat hai

lahad mein paida hone wale bachche

hamari man aankh hai

qabr to miTTi ka makr hai

phir parinde suraj se pahle kisi ka zikr karte hain

aawaz ke alawa bhi insan hai

TuTe ho

zara aur lahu angar karo

ki main ek be-libas aurat hun

aur jitni chahun aankhen rakhti hun

main ne aawaz ko tarasha hai

hai koi mera mujassama banane wala

apni qismat pe udas mat ho

maut ki sharm abhi baqi hai

mujhe chadar dene wale

tujhe haya tak dukh lag jaen

mujhe lafz dene wale

kash aurat bhi janaze ko kandha de sakti

har qadam zanjir malum ho raha hai aur mera dil tah kar ke rakh diya

gaya hai shor mujhe lahuluhan kar raha hai main

apni qaid kaT rahi hun aur is qaid mein kabhi

hath kaT kar phenk deti hun kabhi

aawaz kaT kaT kar phenk rahi hun

mera dil daldal mein rahne wala kiDa hai aur main qabr se

dhutkari hui lash

saDandi hi saDand se meri aankhon ka

zaiqa bad-ruh ho raha hai

aur main insan ki pahli aur aaKHiri ghalati par dum hilae

bhaunkti ja rahi hun

main jab insan thi to chor ki aas tak na thi main

aankhon mein salib aur dil mein apni lash

liye phirti hun

sachchaiyon ke zahr se mari hun

lekin duniya gorkan ko DhunDhne gai hui hai

wo mujhe aabaad karta hai aur aabaad kahta hai

main hari-bhari pyas se zarKHez ho jati hun

aur phulon ko miTTi mein dabane lagti hun

dard mere azhdahe ka nam hai

aur sanp ki bhuk mera ghar hai