kal aaj aur kal

apne mustaqbil-o-māzī kī faqat soch se tū

are nādān kisī tarah pareshān na ho

haal hī terā vajūd aur terī pūñjī hai

ḳharch kar us ko khule haath pashemān na ho

maanā sunñe meñ sunāne meñ bhalī lagtī haiñ

yā kitāboñ meñ paḌhī jaatī haiñ aisī bāteñ

par haqīqat meñ pare hotī haiñ sachchā.ī se

sirf ik falsafa hī rahtī haiñ aisī bāteñ

apnī ye zindagī jis moḌ pe hai aaj khaḌī

raah us kī the dikhāte vo guzishta lamhe

tajarbe jin se ye jiine kā salīqa sīkho

haiñ tumheñ sauñp ke jaate vo guzishta lamhe

phir bhī kahte ho ki maazī kī siyah-rāt kahīñ

haal kī dhuup sunahrī ko na Dasne paa.e

biitī yādoñ ne bichhā.e haiñ jo kuchh jaal yahāñ

in se bachnā hai tumheñ paaoñ na phañsne paa.e

aur phir rakhe qadam tum ne jo in rāhoñ par

manzileñ in kī isī vaqt kā hai duujā chhor

kal agar ik hai patañg aaj bane us kī Dor

hai asar kal kā vaqt-e-hāl pe aisā pur-zor

phir bhī kahte ho ki bas haal hī kī parvā karo

vaqt-e-ā.inda mahz ḳhvāb huā kartā hai

aaj dariyā hai jo halqe se bahā kartā hai

kal ke is bahr meñ girdāb huā kartā hai

hai haqīqat to yahī kahte ho tum haal jise

kiyā thā kal tak nahīñ ā.inda vaqt kā hī qayās

vaqt ke chalte rahe gar ye salāsil yuuñ hī

oḌh legā vahī kal dekhnā maazī kā libās

apne mustaqbil-o-mazi ki faqat soch se tu

are nadan kisi tarah pareshan na ho

haal hi tera wajud aur teri punji hai

KHarch kar us ko khule hath pasheman na ho

mana sunne mein sunane mein bhali lagti hain

ya kitabon mein paDhi jati hain aisi baaten

par haqiqat mein pare hoti hain sachchai se

sirf ek falsafa hi rahti hain aisi baaten

apni ye zindagi jis moD pe hai aaj khaDi

rah us ki the dikhate wo guzishta lamhe

tajarbe jin se ye jine ka saliqa sikho

hain tumhein saunp ke jate wo guzishta lamhe

phir bhi kahte ho ki mazi ki siyah-raat kahin

haal ki dhup sunahri ko na Dasne pae

biti yaadon ne bichhae hain jo kuchh jal yahan

in se bachna hai tumhein paon na phansne pae

aur phir rakhe qadam tum ne jo in rahon par

manzilen in ki isi waqt ka hai duja chhor

kal agar ek hai patang aaj bane us ki Dor

hai asar kal ka waqt-e-haal pe aisa pur-zor

phir bhi kahte ho ki bas haal hi ki parwa karo

waqt-e-ainda mahz KHwab hua karta hai

aaj dariya hai jo halqe se baha karta hai

kal ke is bahr mein girdab hua karta hai

hai haqiqat to yahi kahte ho tum haal jise

kiya tha kal tak nahin aainda waqt ka hi qayas

waqt ke chalte rahe gar ye salasil yun hi

oDh lega wahi kal dekhna mazi ka libas