kal aur aaj

shāḳh par ik peḌ kī

do kabūtar mā.il-e-rāz-o-niyāz

murġh-zāroñ meñ anādil kī chahak

ārizoñ par lāla-zāroñ kī lahak

har galī meñ zulf-e-mushkīñ kī mahak

maañg meñ sindūr kī laalī

hoñT par ḳhandāñ chaman

mai-kade meñ dil ke raqsāñ

ārzūoñ kī dulhan

har qadam par

kahkashāñ hī kahkashāñ

kūcha-o-bāzār meñ

madrasoñ meñ aur miloñ meñ

gaañv meñ aur shahr meñ

har taraf

ziist kī jalvagarī

raushnī hī raushnī

masjidoñ meñ

masnavī-e-maulvī-e-ma.anavī

mahfiloñ meñ

'mīr' o 'ġhālib' kī ġhazal

ma.arkoñ meñ

sho.ala-afshāñ nazarul-e-ātish-bayāñ

radio par

shā.ir-e-mashriq kī nazmeñ

mandiroñ meñ

sūrdās aur aurobindo ke bhajan

shāhrāh-e-vaqt par

zindagī ke sang-e-mīl

thī nigār-e-zīst kal

yuuñ javāñ har-dam ravāñ paiham ravāñ

peḌ nange

shāḳh se laTkā huā

sar kisī ma.asūm kā

aur nīche

jism se chimTā huā

ġhol gidh kā

kūcha-o-bāzār meñ

be-kasī nauhagarī

kār-ḳhānoñ meñ mashīneñ dam-ba-ḳhud

madrasoñ meñ nauha-ḳhvāñ

ilm-o-hikmat ke imaam

campoñ meñ zindagī

ḳhaak barsar naala bar-lab chashm-e-tar

aur saḌkoñ par

dandanātī gāḌiyāñ

jin ke chehre par munaqqash red cross

har taraf

maut kī jalvagarī

tīrgī hī tīrgī

masjidoñ meñ

ḳhuun ke dhabbe numāyāñ jā-ba-jā

mahfiloñ meñ

ḳhāmushī naġhma-sarā

radio ḳhāmosh

television sar-nigūñ

hai nigār-e-zīst aaj

muzmahil dāman-darīda

naqsh-e-ġham nālā-kunāñ

shaKH par ek peD ki

do kabutar mail-e-raaz-o-niyaz

murgh-zaron mein anadil ki chahak

aarizon par lala-zaron ki lahak

har gali mein zulf-e-mushkin ki mahak

mang mein sindur ki lali

honT par KHandan chaman

mai-kade mein dil ke raqsan

aarzuon ki dulhan

har qadam par

kahkashan hi kahkashan

kucha-o-bazar mein

madrason mein aur milon mein

ganw mein aur shahr mein

har taraf

zist ki jalwagari

raushni hi raushni

masjidon mein

masnawi-e-maulwi-e-manawi

mahfilon mein

'mir' o 'ghaalib' ki ghazal

markon mein

shoala-afshan nazarul-e-atish-bayan

radio par

shair-e-mashriq ki nazmen

mandiron mein

surdas aur aurobindo ke bhajan

shahrah-e-waqt par

zindagi ke sang-e-mil

thi nigar-e-zist kal

yun jawan har-dam rawan paiham rawan

peD nange

shaKH se laTka hua

sar kisi masum ka

aur niche

jism se chimTa hua

ghol gidh ka

kucha-o-bazar mein

be-kasi nauhagari

kar-KHanon mein mashinen dam-ba-KHud

madrason mein nauha-KHwan

ilm-o-hikmat ke imam

campon mein zindagi

KHak barsar nala bar-lab chashm-e-tar

aur saDkon par

dandanati gaDiyan

jin ke chehre par munaqqash red cross

har taraf

maut ki jalwagari

tirgi hi tirgi

masjidon mein

KHun ke dhabbe numayan ja-ba-ja

mahfilon mein

KHamushi naghma-sara

radio KHamosh

telewision sar-nigun

hai nigar-e-zist aaj

muzmahil daman-darida

naqsh-e-gham nala-kunan