kal jo guzar gaya

kal jo guzar gayā

ek ḳhvāb thā ḳhvāb jo TuuT gayā

ā.īne kī tarah

aur TuuTe ā.īne kī kirchiyāñ sameTnā hāthoñ ko lahūluhān kar degā

kal aane vaalā

abr kā ek paara hai

jo tumhārī zamīnoñ par barse baġhair bhī guzar saktā hai

vo tumhārī mauhūm ummīdoñ kā saaya hai

aur saaya kab kis kā ho paayā hai

tum saa.e ko pakaḌne kī koshish mat karo

ki mub.ham ummīdoñ kī nā-puḳhta shāḳheñ

ḳhushī se phuul nahīñ khilā saktīñ

aaj

aaj tumhārā apnā hai

tumhārī muTThī ke sikke kī tarah

aaj ke paudoñ par khilne vaale phūloñ ko chun lo

is se pahle

ki vo murjhā jaa.eñ

kal jo guzar gaya

ek KHwab tha KHwab jo TuT gaya

aaine ki tarah

aur TuTe aaine ki kirchiyan sameTna hathon ko lahuluhan kar dega

kal aane wala

abr ka ek para hai

jo tumhaari zaminon par barse baghair bhi guzar sakta hai

wo tumhaari mauhum ummidon ka saya hai

aur saya kab kis ka ho paya hai

tum sae ko pakaDne ki koshish mat karo

ki mubham ummidon ki na-puKHta shaKHen

KHushi se phul nahin khila saktin

aaj

aaj tumhaara apna hai

tumhaari muTThi ke sikke ki tarah

aaj ke paudon par khilne wale phulon ko chun lo

is se pahle

ki wo murjha jaen