kal walon ke liye

hameñ un se milnā hai

jo kal ke haiñ

hamāre paas vo kal haiñ

aur un ke darmiyān hai

ma.adūm ek aaj

jis kā raqbā ek sifr par muhīt hai

is sifr meñ hai ek duniyā

jo kal se aa.ī hai

aur kal kī taraf jā rahī hai

ham is kal par ek qālīn bichhāte

jo jahannam meñ chalne kā mashvara detī hai

maiñ us se pūchhtā huuñ

kyā us ne visa lagvā liyā hai

merā passport re-new hone gayā hai

agar mere paas

hukkām kī jadīd kanīzoñ ke liye

nā-munāsib na samjhe jaane vaale tohfe hue

to maiñ passport ke baġhair bhī

is ke saath jaane ke liye

kashtī meñ savār kar diyā gayā

aur kashtī par paanī kā kyā udhār hai

ye to maiñ bhī nahīñ jāntā

hamein un se milna hai

jo kal ke hain

hamare pas wo kal hain

aur un ke darmiyan hai

madum ek aaj

jis ka raqba ek sifr par muhit hai

is sifr mein hai ek duniya

jo kal se aai hai

aur kal ki taraf ja rahi hai

hum is kal par ek qalin bichhate

jo jahannam mein chalne ka mashwara deti hai

main us se puchhta hun

kya us ne wisa lagwa liya hai

mera passport re-new hone gaya hai

agar mere pas

hukkaam ki jadid kanizon ke liye

na-munasib na samjhe jaane wale tohfe hue

to main passport ke baghair bhi

is ke sath jaane ke liye

kashti mein sawar kar diya gaya

aur kashti par pani ka kya udhaar hai

ye to main bhi nahin jaanta