کنس

اس کو یوں لگتا تھا جیسے کچھ نہ کچھ کل ہو رہے گا

جب وہ مڑ کر دیکھتا تھا اس کو یوں لگتا تھا جیسے اک بہن کے سات بیٹے اس کا پیچھا کر رہے ہوں

آئنے میں عکس اس کو صرف گردن تک دکھائی دے رہا تھا

اس کی پرچھائیں یوں لگتی تھی کہ جیسے روزنوں سے اٹ گئی

سانس کی آواز جانے کس جگہ گم ہو گئی تھی

ہر ستارہ جیسے خود کو آنکھ میں دہرا رہا تھا

جب وہ چاہتا تھا تو اس کے نقش پا مٹی پہ بنتے ہی نہیں تھے

جیسے اس نے سرخ شعلے ہار میں گونتھے ہوئے ہوں

جیسے وہ متھرا میں مادر زاد ننگا پھر رہا ہو

اور اس کو یاد آیا اس کو نارد نے بتایا تھا وہ اپنے باپ کا بیٹا نہیں ہے

اس کا تنہا فرض اپنے رشتہ داروں پر مظالم توڑنا ہے

اس کو کیا معلوم تھا جب موت آئے گی تو رشتہ دار بن کر آئے گی

جب وہ مڑ کر دیکھتا تھا اس کو یوں لگتا تھا جیسے آٹھویں بیٹے کے دست راست میں

اک گدا ہے جس پہ اس کے نام کے ہجے رقم ہیں