کر کے اک بار تغافل نہ مجھے پیار کرو

کر کے اک بار تغافل نہ مجھے پیار کرو

پھر سے خوابیدہ تمنا کو نہ بیدار کرو

جانتا ہوں کہ تمہارے لئے اک غیر ہوں میں

تم پہ کیا حق ہے مرا تم مجھے کیوں پیار کرو

دسترس سے مری باہر ہو تم اے جان جہاں

دل مگر پھر بھی یہ کہتا ہے مجھے پیار کرو

چپکے چپکے میں تمہیں پیار کیا کرتا تھا

میں نے کب تم سے کہا تھا کہ مجھے پیار کرو

دل بیتاب مرا ہوش میں آ جائے گا

اپنی ان مست نگاہوں کو تو ہشیار کرو

بے رخی تھی تو عیادت کو نہ آئے ہوتے

اب جو آئے ہو تو کچھ پرسش بیمار کرو

ہجر جاناں میں طبیعت جو مکدر ہے جلیلؔ

جاؤ کچھ دیر کو سیر گل و گل زار کرو