kar ke ek bar taghaful na mujhe pyar karo

kar ke ik baar taġhāful na mujhe pyaar karo

phir se ḳhvābīda tamanna ko na bedār karo

jāntā huuñ ki tumhāre liye ik ġhair huuñ maiñ

tum pe kyā haq hai mirā tum mujhe kyoñ pyaar karo

dastaras se mirī bāhar ho tum ai jān-e-jahāñ

dil magar phir bhī ye kahtā hai mujhe pyaar karo

chupke chupke maiñ tumheñ pyaar kiyā kartā thā

maiñ ne kab tum se kahā thā ki mujhe pyaar karo

dil-e-betāb mirā hosh meñ aa jā.egā

apnī in mast nigāhoñ ko to hushiyār karo

be-ruḳhī thī to ayādat ko na aa.e hote

ab jo aa.e ho to kuchh pursish-e-bīmār karo

hijr-e-jānāñ meñ tabī.at jo mukaddar hai 'jalīl'

jaao kuchh der ko sair-e-gul-o-gulzār karo

kar ke ek bar taghaful na mujhe pyar karo

phir se KHwabida tamanna ko na bedar karo

jaanta hun ki tumhaare liye ek ghair hun main

tum pe kya haq hai mera tum mujhe kyon pyar karo

dastaras se meri bahar ho tum ai jaan-e-jahan

dil magar phir bhi ye kahta hai mujhe pyar karo

chupke chupke main tumhein pyar kiya karta tha

main ne kab tum se kaha tha ki mujhe pyar karo

dil-e-betab mera hosh mein aa jaega

apni in mast nigahon ko to hushiyar karo

be-ruKHi thi to ayaadat ko na aae hote

ab jo aae ho to kuchh pursish-e-bimar karo

hijr-e-jaanan mein tabiat jo mukaddar hai 'jalil'

jao kuchh der ko sair-e-gul-o-gulzar karo