karahte hue dil

maiñ aspatāl ke bistar pe tum se itnī duur

ye sochtā huuñ ki aisī ajiib duniyā meñ

na jaane aaj ke din kyā nahīñ huā hogā

kisī ne baḌh ke sitāre qafas kiye hoñge

kisī ke haat meñ mahtāb aa gayā hogā

jalā.ī hoñgī kisī ke nafas ne qindīleñ

kisī kī bazm meñ ḳhurshīd nāchtā hogā

kisī ko zehn kā chhoTā sā tāziyāna bahut

kisī ko dil kī kashākash kā hausla hogā

na jaane kitne irāde ubhar rahe hoñge

na jaane kitne ḳhayāloñ kā dil baḌhā hogā

tumhārī phuul sī fitrat kī sat.h-e-narm se duur

pahāḌ hoñge samundar kā rāsta hogā

ye ek farz kā māhaul farz kā sañgīt

ye aspatāl ke aañsū ye aspatāl kī riit

mire qarīb bahut se marīz aur bhī haiñ

pukārtī huī āñkheñ karāhte hue dil

bahut aziiz hai in sab ko zindagī apnī

ye apnī ziist kā ehsās kaisī ne.amat hai

magar mujhe yahī uljhan ki zindagī kī ye bhiik

jo mil ga.ī bhī to kitnī zarā sī baat milī

kisī ke haat meñ mahtāb aa gayā bhī to kyā

kisī ke qadmoñ meñ sūraj kā sar jhukā bhī to kyā

huā hī kyā jo ye chhoTī sī kā.enāt milī?

mire vajūd kī gahrī ḳhamosh vīrānī

tumheñ yahāñ ke añdhere kā ilm kyā hogā

tumheñ to sirf muqaddar se chāñd raat milī

main aspatal ke bistar pe tum se itni dur

ye sochta hun ki aisi ajib duniya mein

na jaane aaj ke din kya nahin hua hoga

kisi ne baDh ke sitare qafas kiye honge

kisi ke hat mein mahtab aa gaya hoga

jalai hongi kisi ke nafas ne qindilen

kisi ki bazm mein KHurshid nachta hoga

kisi ko zehn ka chhoTa sa taziyana bahut

kisi ko dil ki kashakash ka hausla hoga

na jaane kitne irade ubhar rahe honge

na jaane kitne KHayalon ka dil baDha hoga

tumhaari phul si fitrat ki sath-e-narm se dur

pahaD honge samundar ka rasta hoga

ye ek farz ka mahaul farz ka sangit

ye aspatal ke aansu ye aspatal ki rit

mere qarib bahut se mariz aur bhi hain

pukarti hui aankhen karahte hue dil

bahut aziz hai in sab ko zindagi apni

ye apni zist ka ehsas kaisi neamat hai

magar mujhe yahi uljhan ki zindagi ki ye bhik

jo mil gai bhi to kitni zara si baat mili

kisi ke hat mein mahtab aa gaya bhi to kya

kisi ke qadmon mein suraj ka sar jhuka bhi to kya

hua hi kya jo ye chhoTi si kaenat mili?

mere wajud ki gahri KHamosh virani

tumhein yahan ke andhere ka ilm kya hoga

tumhein to sirf muqaddar se chand raat mili