karmon ka phal

hamāre karmoñ kā phal hamāre sāmne hai

bhaa.ī nekī karnā paap hai

tum ne nahīñ sunā ki ye agle vaqtoñ kī baat hai

tum ko duniyā meñ rahne kā Dhab kab aa.egā jañgalī

saare naate ḳhushbuoñ kī tarah nahīñ hote

in meñ daldaloñ kī bisāñd bhī hotī hai

muaaf karnā yā muāfī māñgnā koī achchhā fe.al nahīñ hai

muāfī bhalā kis kis baat kī

umr saarī guzar jā.egī aur ek baat kī talāfī bhī na ho pā.egī

phir tez raftār duniyā meñ

kis kis kā dāman pakḌoge

dāman to ḳhud havā ho gayā hai

phir havā ko muTThī meñ band karo

nahīñ bakvās

tum sīdhī-sādī zindagī guzāro ummīd ko kaalī sandal se itnā maaro ki

surḳh chāñdnī

kaalī siyāh raat kī tarah hamāre dukhoñ ko apne dāman meñ sameT le

hamare karmon ka phal hamare samne hai

bhai neki karna pap hai

tum ne nahin suna ki ye agle waqton ki baat hai

tum ko duniya mein rahne ka Dhab kab aaega jangali

sare nate KHushbuon ki tarah nahin hote

in mein daldalon ki bisand bhi hoti hai

muaf karna ya muafi mangna koi achchha feal nahin hai

muafi bhala kis kis baat ki

umr sari guzar jaegi aur ek baat ki talafi bhi na ho paegi

phir tez raftar duniya mein

kis kis ka daman pakDoge

daman to KHud hawa ho gaya hai

phir hawa ko muTThi mein band karo

nahin bakwas

tum sidhi-sadi zindagi guzaro ummid ko kali sandal se itna maro ki

surKH chandni

kali siyah raat ki tarah hamare dukhon ko apne daman mein sameT le