kartik

paanī meñ aks dekhā

jañgal meñ raqs dekhā

sūraj libās pahne

chandā se ziyāda ThanDā

us raat ā.īne meñ

ik aisā shaḳhs dekhā

chāñdnī ke rath par saj ke

us shaḳhs kī savārī

ab ho rahī hai dekho

sū-e-ufuq ravāna

ab lā.egī vahāñ se

kuchh dard kā ḳhazāna

un manzaroñ se haT ke

jharne ke shor-o-shar meñ

ham ne nahāte dekhī

ik huur be-hijābī

chāñdnī ke bahr o bar meñ

kārtik kī ḳhvāb-nākī āñkhoñ ke do-jahāñ tak

kātik kī chandrmā.ī sapnoñ ke lā-makāñ tak

ai lā-makāñ makānī

sun ke sadā kisī kī

juuñ pīchhe muḌ ke dekhā

vaañ duur koh-e-dil kī nam nam sī lakḌiyoñ kā

birhan sā ḳhūb-sūrat choTī pe ik makāñ thā

lekin vo jal rahā thā

kātik kī chāñdnī meñ!

pani mein aks dekha

jangal mein raqs dekha

suraj libas pahne

chanda se ziyaada ThanDa

us raat aaine mein

ek aisa shaKHs dekha

chandni ke rath par saj ke

us shaKHs ki sawari

ab ho rahi hai dekho

su-e-ufuq rawana

ab laegi wahan se

kuchh dard ka KHazana

un manzaron se haT ke

jharne ke shor-o-shar mein

hum ne nahate dekhi

ek hur be-hijabi

chandni ke bahr o bar mein

kartik ki KHwab-naki aankhon ke do-jahan tak

katik ki chandrmai sapnon ke la-makan tak

ai la-makan makani

sun ke sada kisi ki

jun pichhe muD ke dekha

wan dur koh-e-dil ki nam nam si lakDiyon ka

birhan sa KHub-surat choTi pe ek makan tha

lekin wo jal raha tha

katik ki chandni mein!