kasak

tire dil meñ ġhaltāñ ho gar vo anokhī kasak

ki jis ke sabab tujh ko har shai pukāre, kahe:

mujhe dekh merī taraf aa mujhe pyaar kar

tū lapke to har chiiz tujh se khiñche duur duur

tire dil meñ ho mauj-dar-mauj ik sail-e-dard

magar tū na samjhe kashish kyā hai duurī hai kyuuñ

faqat vo anokhī ḳhalish dil meñ ġhaltāñ rahe

havāoñ ke hāthoñ meñ betāb maujoñ ke daf

huā tesha-zan sabz sayyāl billor par

havā se dhaḌakte samundar ke sāhil pe kaf

ye āmezish-e-husn-o-ḳhauf aarzū o farār

tire dil meñ ġhaltāñ rahe vo anokhī kasak

tafāvut kabhī nit badaltī umañgoñ meñ dekh

tafāvut kabhī lahke sabze ke rañgoñ meñ dekh

kahīñ taaza koñpal meñ sabze kī halkī jhalak

kahīñ Tahnī Tahnī badaltā hai pattoñ kā aks

kabhī dhuup meñ nikhrā nikhrā hai rañgoñ kā ruup

kabhī chhāñv meñ shaam ke saa.e meñ abr meñ

sabhī rañg kuchh aur bhī gahre hote hue

tafāvut se jin kī tirī aañkh hairāñ rahe

ye hairat kashish hai kashish meñ anokhī kasak

tirī fahm kī dastaras se magar duur duur

ye mīThī rasīlī anokhī kasak ziist hai

tere dil mein ghaltan ho gar wo anokhi kasak

ki jis ke sabab tujh ko har shai pukare, kahe:

mujhe dekh meri taraf aa mujhe pyar kar

tu lapke to har chiz tujh se khinche dur dur

tere dil mein ho mauj-dar-mauj ek sail-e-dard

magar tu na samjhe kashish kya hai duri hai kyun

faqat wo anokhi KHalish dil mein ghaltan rahe

hawaon ke hathon mein betab maujon ke daf

hua tesha-zan sabz sayyal billor par

hawa se dhaDakte samundar ke sahil pe kaf

ye aamezish-e-husn-o-KHauf aarzu o farar

tere dil mein ghaltan rahe wo anokhi kasak

tafawut kabhi nit badalti umangon mein dekh

tafawut kabhi lahke sabze ke rangon mein dekh

kahin taza konpal mein sabze ki halki jhalak

kahin Tahni Tahni badalta hai patton ka aks

kabhi dhup mein nikhra nikhra hai rangon ka rup

kabhi chhanw mein sham ke sae mein abr mein

sabhi rang kuchh aur bhi gahre hote hue

tafawut se jin ki teri aankh hairan rahe

ye hairat kashish hai kashish mein anokhi kasak

teri fahm ki dastaras se magar dur dur

ye miThi rasili anokhi kasak zist hai