kashf

maiñ apnī khoj meñ gum thī

ki maiñ kyā huuñ

azal ke hādse kā silsila huuñ

yā faqat miTTī kī mūrat huuñ

musaḳhḳhar karne vaalā zehn huuñ

ehsās kī dhīmī sajal āvāz huuñ

yā apne ḳhāliq kī

koī aisī adā huuñ

jo use ḳhud bhā ga.ī hai

tumheñ paayā to ye jaanā

ki merā bhī koī mafhūm hogā

tumheñ kho kar

mire mafhūm kī sūrat nikhar aa.ī

fishār-e-be-yaqīnī ne

vafā ke ba.ad gumbad meñ

azal ke karb kī sūrat meñ

apnī ibtidā dekhī

abad ke aa.ine meñ

intihā kā naqsh bhī dekhā

ḳhudā kā aks bhī dekhā

main apni khoj mein gum thi

ki main kya hun

azal ke hadse ka silsila hun

ya faqat miTTi ki murat hun

musaKHKHar karne wala zehn hun

ehsas ki dhimi sajal aawaz hun

ya apne KHaliq ki

koi aisi ada hun

jo use KHud bha gai hai

tumhein paya to ye jaana

ki mera bhi koi mafhum hoga

tumhein kho kar

mere mafhum ki surat nikhar aai

fishaar-e-be-yaqini ne

wafa ke baad gumbad mein

azal ke karb ki surat mein

apni ibtida dekhi

abad ke aaine mein

intiha ka naqsh bhi dekha

KHuda ka aks bhi dekha