kashid shab

aaj kī raat bhī phir ḳhvāb jagā.eñ ge mujhe

phir vo karvaT se ḳhayāloñ ke tasalsul ko miTāne kī kashīd-e-koshish

jism ke dard ko silvaT meñ samo ke

vahī bistar pe taḌapte hue mahjūri-e-jānāñ ko

kabhī aah kabhī saañs kī gahrā.ī meñ shal karne kī

sa.i-e-nākām

ye bhī ma.alūm hai

ye niim rassī fahm kī dīvār talak jast

ye saa.e kī tasvīr kisī shakl-o-shabāhat ke tasalsul ke nishāñ haiñ lekin

nā-subūrī ye badan toḌtī añgḌā.iyāñ

hoñToñ pe mahaktī larzish

baat ko rabt ke āhañg meñ laane kī talab

mere siine kā dhuāñ āñkheñ sharābor kiye

har bun-e-mū ko mulāqāt kā juuyā kar de

aañkh chaḌhte hue dariyā kī tarah hai pur-āb

paañv phisle hai to phir saañs kā rishta na rahe

ham to chāheñ magar is dil ko ye achchhā na lage

jāñ-kanī had se baḌhī chāragaro kuchh to karo

aaj ki raat bhi phir KHwab jagaen ge mujhe

phir wo karwaT se KHayalon ke tasalsul ko miTane ki kashid-e-koshish

jism ke dard ko silwaT mein samo ke

wahi bistar pe taDapte hue mahjuri-e-jaanan ko

kabhi aah kabhi sans ki gahrai mein shal karne ki

sai-e-nakaam

ye bhi malum hai

ye nim rassi fahm ki diwar talak jast

ye sae ki taswir kisi shakl-o-shabahat ke tasalsul ke nishan hain lekin

na-suburi ye badan toDti angDaiyan

honTon pe mahakti larzish

baat ko rabt ke aahang mein lane ki talab

mere sine ka dhuan aankhen sharabor kiye

har bun-e-mu ko mulaqat ka juya kar de

aankh chaDhte hue dariya ki tarah hai pur-ab

panw phisle hai to phir sans ka rishta na rahe

hum to chahen magar is dil ko ye achchha na lage

jaan-kani had se baDhi chaaragaro kuchh to karo