kashmakash

phir kisī moḌ se sañgīt kī lai aatī hai

raqs karte haiñ kahīñ sāġhar-o-mīnā jaise

nik.hat-e-gul hai kahīñ

mast gulshan hai kahīñ

mahkī mahkī hai havā

bhīnī bhīnī sī fazāoñ meñ hai ḳhushbū shāmil

ik muqaddas tanvīr

ik latāfat har sū

mujh ko lagtā hai yahī

chashm-e-raushan mirī hastī ko hai yuuñ ghere hue

jaise maañ bachche ko bāhoñ meñ jakaḌ letī hai

aur maiñ soch rahī huuñ tanhā

zehn ke band darīchoñ ko na khulne dūñgī

aur naqībān-e-mohabbat ko na labbaik kahūñgī

kab tak

kab tak

phir kisi moD se sangit ki lai aati hai

raqs karte hain kahin saghar-o-mina jaise

nikhat-e-gul hai kahin

mast gulshan hai kahin

mahki mahki hai hawa

bhini bhini si fazaon mein hai KHushbu shamil

ek muqaddas tanwir

ek latafat har su

mujh ko lagta hai yahi

chashm-e-raushan meri hasti ko hai yun ghere hue

jaise man bachche ko bahon mein jakaD leti hai

aur main soch rahi hun tanha

zehn ke band darichon ko na khulne dungi

aur naqiban-e-mohabbat ko na labbaik kahungi

kab tak

kab tak