kasrat-e-aulad

kasrat-e-aulād se ham is qadar bezār haiñ

ab to begam se alag rahne ko bhī tayyār haiñ

ab ye aalam hai ki jas kamre meñ bhī Daalo nazar

ghar ke har kone meñ haiñ bikhre ho.e laḳht-e-jigar

apnī begam par hue shām-o-sahar ham yuuñ nisār

posTaroñ kī shakl meñ rassī pe laTkā hai vo pyaar

jis taraf bhī dekhiye aulād hī aulād hai

ḳhāna-ābādī ke ba.ad ab ḳhāna-e-barbād hai

sard aa.heñ dekh kar begam ko ham bharne lage

muskurā kar dekhne se in ke ham Darne lage

chiḌchiḌe kuchh is qadar ham ho rahe haiñ āj-kal

rakh kai ḳhanjar darmiyāñ meñ so rahe haiñ āj-kal

ḳhuun ke aañsū ham apne haal par rone lage

pahle single ho rahe the ab double hone lage

mujh ko ye Dar hai kabhī shaitān bahkāne lage

ham miyāñ-bīvī qarīb aane se katrāne lage

ham kisī taqrīb meñ hoñ yā kisī bārāt meñ

log Dar jaate haiñ bachche dekh kar hī saath meñ

dekh kar logoñ kā ġhussa kitne ghabrā.e the ham

apne bachchoñ kī jagah un ke uThā laa.e the ham

saas bhī ab to hameñ kuchh din ko bulvātī nahīñ

aur begam bhī binā bulvā.e ḳhud jaatī nahīñ

is daf.a phir jab vilādat kā huā thā silsila

aa ga.e ā.ankhoñ meñ aañsū maiñ ne ro kar yuuñ kahā

mere ghar meñ to bahut pahle hī se bhar-mār hai

aur tū duniyā meñ aane kai liye tayyār hai

Taal de apnī vilādat aur kuchh din ke liye

tū ne ham se kaun se badle ye gin gin ke liye

kyā kahūñ hālāt apne āj-kal aise nahīñ

ab to marne ke liye bhī jeb meñ paise nahīñ

koī bīmārī agar aa jaa.e to jaatī nahīñ

ḳharch ke Dar se hameñ to maut bhī aatī nahīñ

kasrat-e-aulad se hum is qadar bezar hain

ab to begam se alag rahne ko bhi tayyar hain

ab ye aalam hai ki jas kamre mein bhi Dalo nazar

ghar ke har kone mein hain bikhre hoe laKHt-e-jigar

apni begam par hue sham-o-sahar hum yun nisar

posTaron ki shakl mein rassi pe laTka hai wo pyar

jis taraf bhi dekhiye aulad hi aulad hai

KHana-abaadi ke baad ab KHana-e-barbaad hai

sard aahen dekh kar begam ko hum bharne lage

muskura kar dekhne se in ke hum Darne lage

chiDchiDe kuchh is qadar hum ho rahe hain aaj-kal

rakh kai KHanjar darmiyan mein so rahe hain aaj-kal

KHun ke aansu hum apne haal par rone lage

pahle single ho rahe the ab double hone lage

mujh ko ye Dar hai kabhi shaitan bahkane lage

hum miyan-biwi qarib aane se katrane lage

hum kisi taqrib mein hon ya kisi baraat mein

log Dar jate hain bachche dekh kar hi sath mein

dekh kar logon ka ghussa kitne ghabrae the hum

apne bachchon ki jagah un ke uTha lae the hum

sas bhi ab to hamein kuchh din ko bulwati nahin

aur begam bhi bina bulwae KHud jati nahin

is dafa phir jab wiladat ka hua tha silsila

aa gae aaankhon mein aansu main ne ro kar yun kaha

mere ghar mein to bahut pahle hi se bhar-mar hai

aur tu duniya mein aane kai liye tayyar hai

Tal de apni wiladat aur kuchh din ke liye

tu ne hum se kaun se badle ye gin gin ke liye

kya kahun haalat apne aaj-kal aise nahin

ab to marne ke liye bhi jeb mein paise nahin

koi bimari agar aa jae to jati nahin

KHarch ke Dar se hamein to maut bhi aati nahin