katba

kal jo qabristān se lauTā

to tanhā.ī kā ik bojh uThā kar laayā

aise lagtā thā ki maiñ bujhtā diyā huuñ

aur sab log tamāshā.ī haiñ

muntazir haiñ ki mere bujhne kā manzar dekheñ

aise lagtā thā ki har gaam par khulte dahāne haiñ

mere jism ko āġhosh meñ lene ke liye

zindagī duur khaḌī hañstī rahī

qahqahoñ kā ik samundar

merī jānib mauj-dar-mauj baḌhā

shab kā sannāTā

falak-bos imārāt ke Darboñ meñ vo hilte hue saa.e

jaise marghaT kā samāñ ho

rāste naag kī mānind dahāne khole

kahīñ fōtpath pe leTe hue be-jān se jism

jin pe khambe yuuñ khaḌe the

jaise ye katbe gaḌe hoñ

phir achānak vo brakoñ kī creach

surḳh-ḳhūñ kā ek favvārā

vo ik kutte kī laash

zindagī ek tilismāt-kadā

jis kī dīvāroñ kī zīnat ke liye

lamhoñ kī rañgī titliyāñ patthar huiiñ

kal jo qabristan se lauTa

to tanhai ka ek bojh uTha kar laya

aise lagta tha ki main bujhta diya hun

aur sab log tamashai hain

muntazir hain ki mere bujhne ka manzar dekhen

aise lagta tha ki har gam par khulte dahane hain

mere jism ko aaghosh mein lene ke liye

zindagi dur khaDi hansti rahi

qahqahon ka ek samundar

meri jaanib mauj-dar-mauj baDha

shab ka sannaTa

falak-bos imaraat ke Darbon mein wo hilte hue sae

jaise marghaT ka saman ho

raste nag ki manind dahane khole

kahin footpath pe leTe hue be-jaan se jism

jin pe khambe yun khaDe the

jaise ye katbe gaDe hon

phir achanak wo brakon ki creach

surKH-KHun ka ek fawwara

wo ek kutte ki lash

zindagi ek tilismat-kada

jis ki diwaron ki zinat ke liye

lamhon ki rangi titliyan patthar huin