kaTh-putli

mere hamdam

maiñ ki tujh ko chāhtā thā bhūlnā

maiñ ki terī raah se katrā rahā thā

maiñ ki terī yaad siine meñ dabā.e jā rahā thā

maiñ ki terā pyaar duniyā se chhupā.e jā rahā thā

hādisa phir ho gayā

merā dil tanhā.iyoñ meñ kho gayā

tere ghar ke sāmne

maiñ guzartā jā rahā thā tez tez

ki achānak car puncture ho ga.ī

tere ghar ke sāmne

na Thahar saktā thā maiñ

na hī jā saktā thā maiñ

maiñ bahut hairān thā

maiñ bahut āzurda thā

vo ki mujh se pyaar karte the kabhī

vo ki merā naam japte the kabhī

sāmne baiThe rahe

par na merī jānib uTh kar aa sake

jaise maiñ un kā na thā

jaise maiñ terā na thā

jaise maiñ begāna thā

apnī is tauhīn par

maiñ bahut sharminda thā

maiñ bahut pazhmurda thā

tujh se lekin kyā gila

na tire siine meñ dil

na tirī koī umang

tū to kaTh-putlī hai ek

mujh ko tujh se kyā gila

mere hamdam

main ki tujh ko chahta tha bhulna

main ki teri rah se katra raha tha

main ki teri yaad sine mein dabae ja raha tha

main ki tera pyar duniya se chhupae ja raha tha

hadisa phir ho gaya

mera dil tanhaiyon mein kho gaya

tere ghar ke samne

main guzarta ja raha tha tez tez

ki achanak car puncture ho gai

tere ghar ke samne

na Thahar sakta tha main

na hi ja sakta tha main

main bahut hairan tha

main bahut aazurda tha

wo ki mujh se pyar karte the kabhi

wo ki mera nam japte the kabhi

samne baiThe rahe

par na meri jaanib uTh kar aa sake

jaise main un ka na tha

jaise main tera na tha

jaise main begana tha

apni is tauhin par

main bahut sharminda tha

main bahut pazhmurda tha

tujh se lekin kya gila

na tere sine mein dil

na teri koi umang

tu to kaTh-putli hai ek

mujh ko tujh se kya gila