kaTi pahaDi

hamāre shahr kī ābādī ke darmiyān

kisī bhī samjhaute ke imkān ko mustarad karte hue

shahr ke shumāl maġhrib meñ

duur tak phailī huī pahāḌī meñ ek shigāf Daal diyā gayā hai

pahāḌī ko kāTne kā ye achhūtā ḳhayāl

shahr ke kuchh me.amāroñ ke zehn meñ kyā aayā

shahr ke makānoñ ke dar-o-dīvār

is na.ī tafrīq ke shor-o-shar se

tap kar surḳh ho ga.e

aur shahr ke uupar mañDlāne lage

qismat āzmā.ūñ ke azā.em

shahr ko ab na.e zāviyoñ se dekhā jaane lagā

ab is pahāḌī meñ

ka.ī ek aise maqāmāt dikhā.ī dene lage haiñ

jahāñ se use mazīd kaaTā

yā kamzor kiyā jā saktā hai

pahāḌī ke kaTte hī

us paas kī ābādiyoñ ne apnī hudūd ko

na.e sire se tartīb de liyā hai

kaTāo se shahr meñ havā kā dabāo

ġhair-mustahkam ho gayā hai

gāḌiyoñ ke route badalne lage

jamī jamā.ī ābādī

mutazalzal ho ga.ī

bāzāroñ aur ḳharīdāroñ ke rañg ruup

aur chehre mohre tabdīl ho ga.e haiñ

log shāh-rāhoñ

makānoñ

parkoñ

schōloñ aur ibādat-gāhoñ ko

yuuñ dekhne lage

jaise un ke biich bhī unheñ

shigāf dikhā.ī dene lage hoñ

kaTī huī pahāḌī ne

ham sab ke chehroñ ke biich

ek mustaqil darāḌ Daal dī hai

in me.amāroñ se zyāda

jinhoñ ne pahāḌī meñ shigāf Daalā

ham har us shai se ḳhauf-zada haiñ

jis meñ ba-zāhir koī shigāf yā darāḌ dikhā.ī nahīñ detī

par jis ke darmiyān se

mustaqil jhāñk rahī hai

kaTī huī pahāḌī

hamare shahr ki aabaadi ke darmiyan

kisi bhi samjhaute ke imkan ko mustarad karte hue

shahr ke shumal maghrib mein

dur tak phaili hui pahaDi mein ek shigaf Dal diya gaya hai

pahaDi ko kaTne ka ye achhuta KHayal

shahr ke kuchh meamaron ke zehn mein kya aaya

shahr ke makanon ke dar-o-diwar

is nai tafriq ke shor-o-shar se

tap kar surKH ho gae

aur shahr ke upar manDlane lage

qismat aazmaun ke azaem

shahr ko ab nae zawiyon se dekha jaane laga

ab is pahaDi mein

kai ek aise maqamat dikhai dene lage hain

jahan se use mazid kaTa

ya kamzor kiya ja sakta hai

pahaDi ke kaTte hi

us pas ki aabaadiyon ne apni hudud ko

nae sire se tartib de liya hai

kaTao se shahr mein hawa ka dabao

ghair-mustahkam ho gaya hai

gaDiyon ke route badalne lage

jami jamai aabaadi

mutazalzal ho gai

bazaron aur KHaridaron ke rang rup

aur chehre mohre tabdil ho gae hain

log shah-rahon

makanon

parkon

schoolon aur ibaadat-gahon ko

yun dekhne lage

jaise un ke bich bhi unhen

shigaf dikhai dene lage hon

kaTi hui pahaDi ne

hum sab ke chehron ke bich

ek mustaqil daraD Dal di hai

in meamaron se zyaada

jinhon ne pahaDi mein shigaf Dala

hum har us shai se KHauf-zada hain

jis mein ba-zahir koi shigaf ya daraD dikhai nahin deti

par jis ke darmiyan se

mustaqil jhank rahi hai

kaTi hui pahaDi