kaun dekhega

jo din kabhī nahīñ biitā vo din kab aa.egā

inhī dinoñ meñ is ik din ko kaun dekhegā

us ek din ko jo sūraj kī raakh meñ ġhaltāñ

inhī dinoñ kī tahoñ meñ hai kaun dekhegā

us ek din ko jo hai umr ke zavāl kā din

inhīñ dinoñ meñ numū-yāb kaun dekhegā

ye ek saañs jhameloñ-bharī jugoñ meñ rachī

is apnī saañs meñ kaun apnā ant dekhegā

is apnī miTTī meñ jo kuchh amiT hai miTTī hai

jo din in āñkhoñ ne dekhā hai kaun dekhegā

maiñ roz idhar se guzartā huuñ kaun dekhtā hai

maiñ jab idhar se na guzrūñgā kaun dekhegā

do-rūya sāhil-e-dīvār aur pas-e-dīvār

ik ā.inoñ kā samundar hai kaun dekhegā

hazār chehre ḳhud-ārā haiñ kaun jhāñkegā

mire na hone kī honī ko kaun dekhegā

taḌaḳh ke gard kī tah se agar kahīñ kuchh phuul

khile bhii, koī to dekhegā kaun dekhegā

jo din kabhi nahin bita wo din kab aaega

inhi dinon mein is ek din ko kaun dekhega

us ek din ko jo suraj ki rakh mein ghaltan

inhi dinon ki tahon mein hai kaun dekhega

us ek din ko jo hai umr ke zawal ka din

inhin dinon mein numu-yab kaun dekhega

ye ek sans jhamelon-bhari jugon mein rachi

is apni sans mein kaun apna ant dekhega

is apni miTTi mein jo kuchh amiT hai miTTi hai

jo din in aankhon ne dekha hai kaun dekhega

main roz idhar se guzarta hun kaun dekhta hai

main jab idhar se na guzrunga kaun dekhega

do-ruya sahil-e-diwar aur pas-e-diwar

ek aainon ka samundar hai kaun dekhega

hazar chehre KHud-ara hain kaun jhankega

mere na hone ki honi ko kaun dekhega

taDaKH ke gard ki tah se agar kahin kuchh phul

khile bhi, koi to dekhega kaun dekhega