kaun hai mujrim shahr-e-ilm ki taraji ka

ye jo baune ḳhudā bane haiñ ajiib shai se jo lag rahe haiñ

haiñ dar-haqīqat ye aadmī hī bas un kī ḳhaslat judā hai thoḌī

anā jo un kī kuchal chukī hai zamīr un kā jo mar gayā hai

ye sach hai zehnī ġhulām haiñ ab ḳhabāsatoñ ke imaam haiñ ye

hamesha jhuk kar mile danī se sanā meñ ratab-ul-lisān ho kar

gunah ko un ke savāb jaanā fareb ko lā-javāb kah kar

unhī ko aaqā unhī ko mālik unhī ko apnā ḳhudā bhī maanā

unhī ke hāthoñ jism-o-jāñ ko ḳhudī ko īmāñ ko bech Daalā

ba-nām-e-ilm-o-adab jo paayā

abdullāh-ibn-e-ubay kī daulat abū-jahl kī vo ḳhāsiyat hai

jo chāheñ un ko kuchh aur kah leñ jo chāheñ insāñ phir bhī samjheñ

magar ye sach hai la.iin haiñ ye

kam-zarf aur haqīr haiñ ye

ye dānāoñ ke haq ko yaksar ġhabī ko mohmal ko bechte haiñ

ye qaum-o-millat kā naam le kar usūl-o-maz.hab kī baat kah kar

nasleñ kitnī tabāh kar ke khetiyāñ apnī sīñchte haiñ

aur habāb dil meñ baiThā

maiñ dekhtā huuñ ye sochtā huuñ

hai kaun mujrim in meñ āḳhir

jo aaqā mālik banā huā thā

yā vo jo baunā ḳhudā banā hai

yā phir vo daanā shikast khā kar

idhar udhar jo bhaTak rahe haiñ

yā vo ġhabī jo haq churā kar

ḳhudā ke ḳhitte meñ aa base haiñ

yā maiñ

ki tanhā muhīt-e-dil meñ

mahz tamāshā-bīñ banā huuñ

ye jo baune KHuda bane hain ajib shai se jo lag rahe hain

hain dar-haqiqat ye aadmi hi bas un ki KHaslat juda hai thoDi

ana jo un ki kuchal chuki hai zamir un ka jo mar gaya hai

ye sach hai zehni ghulam hain ab KHabasaton ke imam hain ye

hamesha jhuk kar mile dani se sana mein ratab-ul-lisan ho kar

gunah ko un ke sawab jaana fareb ko la-jawab kah kar

unhi ko aaqa unhi ko malik unhi ko apna KHuda bhi mana

unhi ke hathon jism-o-jaan ko KHudi ko iman ko bech Dala

ba-nam-e-ilm-o-adab jo paya

abdullah-ibn-e-ubay ki daulat abu-jahl ki wo KHasiyat hai

jo chahen un ko kuchh aur kah len jo chahen insan phir bhi samjhen

magar ye sach hai lain hain ye

kam-zarf aur haqir hain ye

ye danaon ke haq ko yaksar ghabi ko mohmal ko bechte hain

ye qaum-o-millat ka nam le kar usul-o-mazhab ki baat kah kar

naslen kitni tabah kar ke khetiyan apni sinchte hain

aur habab dil mein baiTha

main dekhta hun ye sochta hun

hai kaun mujrim in mein aaKHir

jo aaqa malik bana hua tha

ya wo jo bauna KHuda bana hai

ya phir wo dana shikast kha kar

idhar udhar jo bhaTak rahe hain

ya wo ghabi jo haq chura kar

KHuda ke KHitte mein aa base hain

ya main

ki tanha muhit-e-dil mein

mahz tamasha-bin bana hun