kaun samjhe tujhe

shā.irī

tū parindoñ kī choñchoñ pe ugtī huī naġhmagī

tū daraḳhtoñ kī chhāñv meñ paltī huī sādgī

tū bahāroñ ke dāman meñ bikhrī huī be-ḳhudī

tū sulagte savāloñ ke bātin meñ bahkī huī aarzū

tū hai ma.asūm bachche kī āñkhoñ meñ hairat-kada

kaun samjhe tujhe

tīrgī raushnī zindagī bebasī aadmī

aur ik kāmanī

kaun terī zabāñ se huā āshnā

kaun samjhā tujhe

pāniyoñ kī laḌā.ī meñ maujoñ ne terī koī

baat maanī hai kyā

sarhadoñ par bhaḌaktī huī aag ne

tere qadmoñ pe bosā diyā hai kabhī

shā.irī

aa zarā dekh le

mere pahlū meñ bargad ke paale hue vasvase

apne māthe se chup kī lakīreñ miTā aur batā

isti.āroñ se bargad kī shāḳheñ bhī kaTtī haiñ kyā

shā.irī

tujh se to

kāmanī kā koī ek jazba bhī mahkā nahīñ

tujh se duniyā meñ kyā inqalāb aa.egā

shā.irī

dekh mere sirhāne tamannā.eñ kitnī haiñ zanjīr-e-pā

kitne ḳhvāboñ ke TuuTe hue

par haiñ bikhre hue

aa ki mil kar ajal ke kisī

gosha-e-nam meñ jaane ko raḳht-e-safar bāñdh leñ

kaun samjhā tujhe kaun samjhe tujhe

shairi

tu parindon ki chonchon pe ugti hui naghmagi

tu daraKHton ki chhanw mein palti hui sadgi

tu bahaaron ke daman mein bikhri hui be-KHudi

tu sulagte sawalon ke baatin mein bahki hui aarzu

tu hai masum bachche ki aankhon mein hairat-kada

kaun samjhe tujhe

tirgi raushni zindagi bebasi aadmi

aur ek kaamani

kaun teri zaban se hua aashna

kaun samjha tujhe

paniyon ki laDai mein maujon ne teri koi

baat mani hai kya

sarhadon par bhaDakti hui aag ne

tere qadmon pe bosa diya hai kabhi

shairi

aa zara dekh le

mere pahlu mein bargad ke pale hue waswase

apne mathe se chup ki lakiren miTa aur bata

istiaron se bargad ki shaKHen bhi kaTti hain kya

shairi

tujh se to

kaamani ka koi ek jazba bhi mahka nahin

tujh se duniya mein kya inqalab aaega

shairi

dekh mere sirhane tamannaen kitni hain zanjir-e-pa

kitne KHwabon ke TuTe hue

par hain bikhre hue

aa ki mil kar ajal ke kisi

gosha-e-nam mein jaane ko raKHt-e-safar bandh len

kaun samjha tujhe kaun samjhe tujhe