kaun samjhega is paheli ko

munich meñ aaj christmas hai

saare manāzir ne safed chādar oḌh rakhī hai

kamre kī khiḌkī se aatī udāsī chahār-sū phailtī jā rahī hai

añdherā udāsiyoñ ke nauhe paḌh rahā hai

mumTiyoñ se phisaltā nahīñ koī kankar

lamhe sākit ho ga.e haiñ

almārī ke ḳhānoñ meñ kuchh yādeñ bikhrī paḌī haiñ

sāmne paḌī kursī jhuul rahī hai

saarā māhaul sogvār hai

ajiib sā Dar hai

jo aañsū ban kar utar rahā hai

āsmāñ saat rang raushaniyāñ

qahqahe saaz naġhmagī

ye hujūm sāl-hā-sāl kī masāfat hai

keñchulī badalne kā ehsās

āñkhoñ kī ḳhāmoshī se athāh gahrā.ī meñ utar rahā hai

maiñ abhī lauT kar nahīñ aa.ī

dil ne barsoñ se rū-e-ālam kī ḳhaak chhānī hai

terī añkhoñ meñ kahīñ vo zamāne simaT ke aa ga.e haiñ

jab quetta airport se nam-nākī ne tumheñ ravāna kiyā

raqs naġhmagī

chūḌiyoñ kī khanak ke nīche haiñ

bhārī hai in sab sāzoñ se

haath ḳhālī haiñ dil vīrān hai

dā.era dā.era ye ḳhāmoshī

dā.era dā.era ye tanhā.ī

jis meñ qadīm āsār

mohan-jodāḌo haḌappa bābil Taxila ke

jo mere andar lamha lamha utarte jaate haiñ

majīd amjad

maiñ fāsloñ kī kamand kī asiir

maiñ terī shālāt

rūd-bār ke pul par baḌī der se khaḌī huuñ

munich mein aaj christmas hai

sare manazir ne safed chadar oDh rakhi hai

kamre ki khiDki se aati udasi chahaar-su phailti ja rahi hai

andhera udasiyon ke nauhe paDh raha hai

mumTiyon se phisalta nahin koi kankar

lamhe sakit ho gae hain

almari ke KHanon mein kuchh yaaden bikhri paDi hain

samne paDi kursi jhul rahi hai

sara mahaul sogwar hai

ajib sa Dar hai

jo aansu ban kar utar raha hai

aasman sat rang raushaniyan

qahqahe saz naghmagi

ye hujum sal-ha-sal ki masafat hai

kenchuli badalne ka ehsas

aankhon ki KHamoshi se athah gahrai mein utar raha hai

main abhi lauT kar nahin aai

dil ne barson se ru-e-alam ki KHak chhani hai

teri ankhon mein kahin wo zamane simaT ke aa gae hain

jab quetta airport se nam-naki ne tumhein rawana kiya

raqs naghmagi

chuDiyon ki khanak ke niche hain

bhaari hai in sab sazon se

hath KHali hain dil viran hai

daera daera ye KHamoshi

daera daera ye tanhai

jis mein qadim aasar

mohan-jodaDo haDappa babil Taxila ke

jo mere andar lamha lamha utarte jate hain

majid amjad

main faslon ki kamand ki asir

main teri shaalat

rud-bar ke pul par baDi der se khaDi hun