kawwe aur hiran ki dosti

ik dasht meñ sunā hai ki ik ḳhuub thā hiran

bachcha hī thā abhī na huā thā baḌā hiran

phirtā thā chaukḌī kā dikhātā mazā hiran

dekhā jo ek kavve ne vo ḳhushnumā hiran

dil ko nihāyat us ke vo achchhā lagā hiran

do bāteñ kar ke kavve ne us ko lagā liyā

dam meñ hiran bhī kavve kī ulfat meñ aa gayā

kavve hiran meñ Thahrī jo gahrī mohabbat aa

kavvā jidhar jidhar ko ḳhushī ho ke jaatā thā

phirtā thā us ke saath lagā jā-ba-jā hiran

ik gīdaḌ us hiran ke kane aa ke nā-bakār

bolā hazār jaan se maiñ tum pe huuñ nisār

mujh ko bhī apnā jaan ġhulām aur dost-dār

aur dil meñ ye ki kiije kisī taur se shikār

us kī daġhā-o-makr se vāqif na thā hiran

gīdaḌ ye kah ke makr se jis dam gayā udhar

kavvā hiran se kahne lagā kar ke shor-o-shar

ye saḳht makr-bāz hai kar is se tū hazar

ik din daġhā se tujh ko ye pakḌegā fitna-gar

sun kar ye baat kavve kī chup ho rahā hiran

din dūsre hiran kane gīdaḌ phir aa gayā

kavve ko sotā dekh ye bolā vo pur-daġhā

maiñ aaj dekh aayā huuñ kyā khet ik harā

tum khaao us ko chal ke to ho shaad dil mirā

sunte hī us ke saath uchhaltā chalā hiran

jis khet pe ye le ke gayā us ko bad-sigāl

vaañ pahle dekh aayā thā vo ik hiran kā jaal

le pahuñchā jab hiran ke ta.iiñ khet par shaġhāl

jaate hī vaañ hiran ne diyā muñh ko us meñ Daal

muñh Dālte hī jaal meñ vaañ phañs gayā hiran

vaañ phaḌphaḌātā aa gayā kavvā bhī nā-gahāñ

gīdaḌ ko de ke gaalī hiran se kahā ki haañ

taḌpe mat is meñ varna tū hovegā nā-tavāñ

kavve kī baat sunte hī himmat ko bāñdh vaañ

jaise girā paḌā thā vahīñ phir uThā hiran

gīdaḌ lagā jab aane hiran kī taraf jhapaT

kavvā pukārā maar to siiñg ik jo jaave haT

yā ik khurī tū aisī lagā paañv kī lapaT

jaave jo us ke lagte hī gīdaḌ kā peT phaT

sun kar khaḌe ho siiñg hilāne lagā hiran

gīdaḌ ne ḳhuub kavve ko diiñ jal ke gāliyāñ

sayyād vaañ huā thā kisī kaam ko ravāñ

us meñ shikārī aa ke huā duur se 'ayāñ

kavvā pukārā leT jā dam band kar ke haañ

dam band kar ke apnā vahīñ gir paḌā hiran

gīdaḌ ne us ko dekh ke ik jā ke jhāḌī lī

sayyād us hiran ko paḌā dekh us ghaḌī

afsos kar ke daam kī rassī vo khol dī

kavvā pukārā bhaag are vaqt hai yahī

sunte hī vaañ se chaukḌī bhar kar uḌā hiran

sayyād ne jo dekhā hiran uTh chalā jhapāk

jaldī se dauḌā pīchhe hiran ke vo sīna-chāk

soñTe ko pheñk maarā jo phurtī se us ne taak

bhāgā hiran lagā vahīñ gīdaḌ ke aa khaTāk

sar us kā phūTā aur vo salāmat gayā hiran

gīdaḌ ne us hiran kā jo chetā thā vaañ burā

paa.ī usī ne apnī badī kī vahīñ sazā

thā ye to nasr maiñ ne ise nazm meñ kiyā

pahuñchā 'nazīr' jab vo ḳhushī ho ke apnī jā

kavve ke saath phir vo bahut ḳhush rahā hiran

ek dasht mein suna hai ki ek KHub tha hiran

bachcha hi tha abhi na hua tha baDa hiran

phirta tha chaukDi ka dikhata maza hiran

dekha jo ek kawwe ne wo KHushnuma hiran

dil ko nihayat us ke wo achchha laga hiran

do baaten kar ke kawwe ne us ko laga liya

dam mein hiran bhi kawwe ki ulfat mein aa gaya

kawwe hiran mein Thahri jo gahri mohabbat aa

kawwa jidhar jidhar ko KHushi ho ke jata tha

phirta tha us ke sath laga ja-ba-ja hiran

ek gidaD us hiran ke kane aa ke na-bakar

bola hazar jaan se main tum pe hun nisar

mujh ko bhi apna jaan ghulam aur dost-dar

aur dil mein ye ki kije kisi taur se shikar

us ki dagha-o-makr se waqif na tha hiran

gidaD ye kah ke makr se jis dam gaya udhar

kawwa hiran se kahne laga kar ke shor-o-shar

ye saKHt makr-baz hai kar is se tu hazar

ek din dagha se tujh ko ye pakDega fitna-gar

sun kar ye baat kawwe ki chup ho raha hiran

din dusre hiran kane gidaD phir aa gaya

kawwe ko sota dekh ye bola wo pur-dagha

main aaj dekh aaya hun kya khet ek hara

tum khao us ko chal ke to ho shad dil mera

sunte hi us ke sath uchhalta chala hiran

jis khet pe ye le ke gaya us ko bad-sigal

wan pahle dekh aaya tha wo ek hiran ka jal

le pahuncha jab hiran ke tain khet par shaghaal

jate hi wan hiran ne diya munh ko us mein Dal

munh Dalte hi jal mein wan phans gaya hiran

wan phaDphaData aa gaya kawwa bhi na-gahan

gidaD ko de ke gali hiran se kaha ki han

taDpe mat is mein warna tu howega na-tawan

kawwe ki baat sunte hi himmat ko bandh wan

jaise gira paDa tha wahin phir uTha hiran

gidaD laga jab aane hiran ki taraf jhapaT

kawwa pukara mar to sing ek jo jawe haT

ya ek khuri tu aisi laga panw ki lapaT

jawe jo us ke lagte hi gidaD ka peT phaT

sun kar khaDe ho sing hilane laga hiran

gidaD ne KHub kawwe ko din jal ke galiyan

sayyaad wan hua tha kisi kaam ko rawan

us mein shikari aa ke hua dur se 'ayan

kawwa pukara leT ja dam band kar ke han

dam band kar ke apna wahin gir paDa hiran

gidaD ne us ko dekh ke ek ja ke jhaDi li

sayyaad us hiran ko paDa dekh us ghaDi

afsos kar ke dam ki rassi wo khol di

kawwa pukara bhag are waqt hai yahi

sunte hi wan se chaukDi bhar kar uDa hiran

sayyaad ne jo dekha hiran uTh chala jhapak

jaldi se dauDa pichhe hiran ke wo sina-chaak

sonTe ko phenk mara jo phurti se us ne tak

bhaga hiran laga wahin gidaD ke aa khaTak

sar us ka phuTa aur wo salamat gaya hiran

gidaD ne us hiran ka jo cheta tha wan bura

pai usi ne apni badi ki wahin saza

tha ye to nasr main ne ise nazm mein kiya

pahuncha 'nazir' jab wo KHushi ho ke apni ja

kawwe ke sath phir wo bahut KHush raha hiran