KHak-e-bisat

jīvan to isī shash-o-panj meñ guzar jaatā hai

duniyā rahne kī jagah hai bhī yā nahīñ

vo log jin se ham bilkul milnā nahīñ chāhte vahī ham se kyuuñ musalsal mil rahe hote haiñ

jinheñ ham bilkul dekhnā nahīñ chāhte vahī kyuuñ musalsal dikhā.ī de rahe hote haiñ

chāhiye to ye thā ki ham apne fuzūl dil ko kisī ḳhairāt-ḳhāne meñ rakh chhoḌte

to ḳhairāt dene vaale ḳhairāt ke saath hiqārat bhī baañT rahe hote

agar zamīn bhar ke peḌ ek ug kar dobāra na ugte

to saath chalne yā saath rahne kā ahd koī bhī nahīñ kartā

nābūd buud ko aur buud nābūd ko ḳhair-bād kah chukā huuñ

tab koī kisī na pūchhtā ki kaun kyā hai kyuuñ hai kaise hai

namāz to faqat niyyat hai magar sire se niyyat hī nahīñ kī ga.ī

kaash kufr hī sachchā hotā

aisā huā hī nahīñ ki aaj tak paanī ne paanī ko aa liyā

aur aag ko aag lag ga.ī

mohabbat ko agar mohabbat lāhaq ho jaatī to koī nāhaq jī nahīñ rahā hotā

āḳhir aisī mausīqī kahāñ hai jo āvāz aur samā.at se māvarā ho

jiwan to isi shash-o-panj mein guzar jata hai

duniya rahne ki jagah hai bhi ya nahin

wo log jin se hum bilkul milna nahin chahte wahi hum se kyun musalsal mil rahe hote hain

jinhen hum bilkul dekhna nahin chahte wahi kyun musalsal dikhai de rahe hote hain

chahiye to ye tha ki hum apne fuzul dil ko kisi KHairaat-KHane mein rakh chhoDte

to KHairaat dene wale KHairaat ke sath hiqarat bhi banT rahe hote

agar zamin bhar ke peD ek ug kar dobara na ugte

to sath chalne ya sath rahne ka ahd koi bhi nahin karta

nabud bud ko aur bud nabud ko KHair-baad kah chuka hun

tab koi kisi na puchhta ki kaun kya hai kyun hai kaise hai

namaz to faqat niyyat hai magar sire se niyyat hi nahin ki gai

kash kufr hi sachcha hota

aisa hua hi nahin ki aaj tak pani ne pani ko aa liya

aur aag ko aag lag gai

mohabbat ko agar mohabbat lahaq ho jati to koi nahaq ji nahin raha hota

aaKHir aisi mausiqi kahan hai jo aawaz aur samaat se mawara ho