KHak-e-hind

ai ḳhāk-e-hind terī 'azmat meñ kyā gumāñ hai

dariyā-e-faiz-e-qudrat tere liye ravāñ hai

terī jabīñ se nūr-e-husn-e-azal 'ayāñ hai

allah re zeb-o-zīnat kyā auj-e-‘izz-o-shāñ hai

har sub.h hai ye ḳhidmat ḳhurshīd-e-pur-ziyā kī

kirnoñ se gūñdhtā hai choTī himāliyā kī

is ḳhāk-e-dil-nashīñ se chashme hue haiñ jaarī

chīn-o-‘arab meñ jin se hotī thī ābyārī

sāre-jahāñ pe jab thā vahshat kā abr taarī

chashm-o-charāġh-e-‘ālam thī sar-zamīñ hamārī

sham’-e-adab na thī jab yūnāñ kī anjuman meñ

tābāñ thā mehr-e-dānish is vādī-e-kuhan meñ

gautam ne aabrū dī is mā’bad-e-kuhan ko

sarmad ne is zamīñ par sadqe kiyā badan ko

akbar ne jām-e-ulfat baḳhshā is anjuman ko

sīñchā lahū se apne raanā ne is chaman ko

sab sūr-bīr apne is ḳhaak meñ nihāñ haiñ

TuuTe hue khañDar haiñ yā un kī haDDiyāñ haiñ

dīvār-o-dar se ab tak un kā asar 'ayāñ hai

apnī ragoñ meñ ab tak un kā lahū ravāñ hai

ab tak asar meñ Duubī nāqūs kī fuġhāñ hai

firdaus-e-gosh ab tak kaifiyyat-e-azāñ hai

kashmīr se 'ayāñ hai jannat kā rang ab tak

shaukat se bah rahā hai dariyā-e-gang ab tak

aglī sī tāzgī hai phūloñ meñ aur phaloñ meñ

karte haiñ raqs ab tak tā.ūs jangaloñ meñ

ab tak vahī kaḌak hai bijlī kī bādaloñ meñ

pastī sī aa ga.ī hai par dil ke hausloñ meñ

gul sham'-e-anjuman hai go anjuman vahī hai

hubb-e-vatan nahīñ hai ḳhāk-e-vatan vahī hai

barsoñ se ho rahā hai barham samāñ hamārā

duniyā se miT rahā hai nām-o-nishāñ hamārā

kuchh kam nahīñ azal se ḳhvāb-e-girāñ hamārā

ik lāsh-e-be-kafan hai hindostāñ hamārā

‘ilm-o-kamāl-o-īmāñ barbād ho rahe haiñ

'aish-o-tarab ke bande ġhaflat meñ so rahe haiñ

ai sūr-e-hubb-e-qaumī is ḳhvāb se jagā de

bhūlā huā fasāna kānoñ ko phir sunā de

murda tabī'atoñ kī afsurdagī miTā de

uThte hue sharāre is raakh se dikhā de

hubb-e-vatan samā.e āñkhoñ meñ nuur ho kar

sar meñ ḳhumār ho kar dil meñ surūr ho kar

shaidā-e-bostāñ ko sarv-o-saman mubārak

rangīñ tabī'atoñ ko rangīñ suḳhan mubārak

bulbul ko gul mubārak gul ko chaman mubārak

ham bekasoñ ko apnā pyārā vatan mubārak

ġhunche hamāre dil ke is baaġh meñ khileñge

is ḳhaak se uThe haiñ is ḳhaak meñ mileñge

ai KHak-e-hind teri 'azmat mein kya guman hai

dariya-e-faiz-e-qudrat tere liye rawan hai

teri jabin se nur-e-husn-e-azal 'ayan hai

allah re zeb-o-zinat kya auj-e-‘izz-o-shan hai

har subh hai ye KHidmat KHurshid-e-pur-ziya ki

kirnon se gundhta hai choTi himaliya ki

is KHak-e-dil-nashin se chashme hue hain jari

chin-o-‘arab mein jin se hoti thi aabyari

sare-jahan pe jab tha wahshat ka abr tari

chashm-o-charagh-e-‘alam thi sar-zamin hamari

sham’-e-adab na thi jab yunan ki anjuman mein

taban tha mehr-e-danish is wadi-e-kuhan mein

gautam ne aabru di is ma’bad-e-kuhan ko

sarmad ne is zamin par sadqe kiya badan ko

akbar ne jam-e-ulfat baKHsha is anjuman ko

sincha lahu se apne rana ne is chaman ko

sab sur-bir apne is KHak mein nihan hain

TuTe hue khanDar hain ya un ki haDDiyan hain

diwar-o-dar se ab tak un ka asar 'ayan hai

apni ragon mein ab tak un ka lahu rawan hai

ab tak asar mein Dubi naqus ki fughan hai

firdaus-e-gosh ab tak kaifiyyat-e-azan hai

kashmir se 'ayan hai jannat ka rang ab tak

shaukat se bah raha hai dariya-e-gang ab tak

agli si tazgi hai phulon mein aur phalon mein

karte hain raqs ab tak taus jangalon mein

ab tak wahi kaDak hai bijli ki baadalon mein

pasti si aa gai hai par dil ke hauslon mein

gul sham'-e-anjuman hai go anjuman wahi hai

hubb-e-watan nahin hai KHak-e-watan wahi hai

barson se ho raha hai barham saman hamara

duniya se miT raha hai nam-o-nishan hamara

kuchh kam nahin azal se KHwab-e-giran hamara

ek lash-e-be-kafan hai hindostan hamara

‘ilm-o-kamal-o-iman barbaad ho rahe hain

'aish-o-tarab ke bande ghaflat mein so rahe hain

ai sur-e-hubb-e-qaumi is KHwab se jaga de

bhula hua fasana kanon ko phir suna de

murda tabi'aton ki afsurdagi miTa de

uThte hue sharare is rakh se dikha de

hubb-e-watan samae aankhon mein nur ho kar

sar mein KHumar ho kar dil mein surur ho kar

shaida-e-bostan ko sarw-o-saman mubarak

rangin tabi'aton ko rangin suKHan mubarak

bulbul ko gul mubarak gul ko chaman mubarak

hum bekason ko apna pyara watan mubarak

ghunche hamare dil ke is bagh mein khilenge

is KHak se uThe hain is KHak mein milenge