KHaka

maiñ musavvir huuñ

par tujh se nādim huuñ maiñ

ki tire tujh se ḳhāke banāne kī maiñ

ab talak ye ikkāvanvīñ koshish bhī puurī nahīñ kar sakā huuñ

ye merī mohabbat kā gahrā ta.assub bhī ho saktā hai

par ye āfāqiyat kā.enātī mohabbat kā radd-e-amal hai

ki ḳhākoñ meñ maiñ terī āñkhoñ pe sāloñ se aTkā huā huuñ

ajab ek uljhan hai

āñkheñ banā.ūñ yā rahne hī duuñ

tere ḳhāke meñ maiñ tere chehre ke azlāt ko khīñch kar

vo tirā ik tabassum banāne kī koshish ko puurā agar kar bhī luuñ

par jo tujh meñ zamānoñ kī tahzīb kī ik kahānī bunī hai

tire lā-shu.ūrī ravayyoñ meñ arboñ baras ke hasīñ irtiqā kā

vo jo ik fasāna

D n a kī bases meñ tartīb pā kar

tujhe to banātā hai vo ik fasāna

vo ḳhākoñ meñ āḳhir ko kaise sunā.ūñ

ai vaj.h-e-suḳhan

jān-o-rang-e-ġhazal

kā.enātī mohabbat kā radd-e-amal

ai udāsī ke hone meñ vāhid ḳhalal

tujh se nādim huuñ maiñ

mere vahm-o-gumāñ meñ qalam meñ mire aur qirtās meñ

terā honā musalsal nahīñ ho rahā

merī bāvanv.īn koshish meñ bhī ab talak

terā ḳhāka mukammal nahīñ ho rahā

main musawwir hun

par tujh se nadim hun main

ki tere tujh se KHake banane ki main

ab talak ye ikkawanwin koshish bhi puri nahin kar saka hun

ye meri mohabbat ka gahra tassub bhi ho sakta hai

par ye aafaqiyat kaenati mohabbat ka radd-e-amal hai

ki KHakon mein main teri aankhon pe salon se aTka hua hun

ajab ek uljhan hai

aankhen banaun ya rahne hi dun

tere KHake mein main tere chehre ke azlat ko khinch kar

wo tera ek tabassum banane ki koshish ko pura agar kar bhi lun

par jo tujh mein zamanon ki tahzib ki ek kahani buni hai

tere la-shuuri rawayyon mein arbon baras ke hasin irtiqa ka

wo jo ek fasana

D n a ki bases mein tartib pa kar

tujhe to banata hai wo ek fasana

wo KHakon mein aaKHir ko kaise sunaun

ai wajh-e-suKHan

jaan-o-rang-e-ghazal

kaenati mohabbat ka radd-e-amal

ai udasi ke hone mein wahid KHalal

tujh se nadim hun main

mere wahm-o-guman mein qalam mein mere aur qirtas mein

tera hona musalsal nahin ho raha

meri bawanwin koshish mein bhi ab talak

tera KHaka mukammal nahin ho raha