KHan-e-matruk

darvāze ke shīshoñ se lagī haiñ āñhkeñ

har goshe meñ maazī kī kamīñ-gāheñ haiñ

yādeñ haiñ ki bikhre hoñ khilaune jaise

kuchh āhaTeñ kuchh qahqahe kuchh aa.heñ haiñ

jo log yahāñ rahte the un ke saa.e

chup-chāp phirā karte haiñ un kamroñ meñ

khoī huī āvāz ga.e vaqtoñ kī

guuñj uThtī hai mānind-e-azāñ kānoñ meñ

maiñ aayā huuñ apne yahāñ mehmāñ ban kar

kuchh roz guzārūñgā chalā jā.ūñgā

miT jā.egā ġham duurī kā dhīre dhīre

kyā jāniye phir lauT ke kab ā.ūñgā

har sañg hai ik sañg-e-malāmat goyā

har katba-e-dīvār hai dushnām mujhe

paimān-e-vafā bāñdhā thā maiñ ne un se

ab takte haiñ hairat se dar-o-bām mujhe

darwaze ke shishon se lagi hain aanhken

har goshe mein mazi ki kamin-gahen hain

yaaden hain ki bikhre hon khilaune jaise

kuchh aahaTen kuchh qahqahe kuchh aahen hain

jo log yahan rahte the un ke sae

chup-chap phira karte hain un kamron mein

khoi hui aawaz gae waqton ki

gunj uThti hai manind-e-azan kanon mein

main aaya hun apne yahan mehman ban kar

kuchh roz guzarunga chala jaunga

miT jaega gham duri ka dhire dhire

kya jaaniye phir lauT ke kab aaunga

har sang hai ek sang-e-malamat goya

har katba-e-diwar hai dushnam mujhe

paiman-e-wafa bandha tha main ne un se

ab takte hain hairat se dar-o-baam mujhe