KHana-ba-dosh

bastī se thoḌī duur chaTTānoñ ke darmiyāñ

Thahrā huā hai ḳhāna-ba-doshoñ kā kārvāñ

un kī kahīñ zamīn na un kā kahīñ makāñ

phirte haiñ yūñhī shaam o sahar zer-e-āsmāñ

dhuup aur abr-o-bār ke maare hue ġharīb

ye log vo haiñ jin ko ġhulāmī nahīñ nasīb

is kārvāñ meñ tifl bhī haiñ naujavāñ bhī haiñ

būḌhe bhī haiñ marīz bhī haiñ nā-tavāñ bhī haiñ

maile phaTe libās meñ kuchh deviyāñ bhī haiñ

sab zindagī se tañg bhī haiñ sargirāñ bhī haiñ

be-zār zindagī se haiñ piir o javāñ sabhī

altāf-e-shahryār ke haiñ nauha-ḳhvāñ sabhī

māthe pe saḳht-koshi-e-paiham kī dāstāñ

āñkhoñ meñ huzn o yaas kī ghanghor badliyāñ

chehroñ pe tāzyāna-e-iflās ke nishāñ

har har adā se bhuuk kī betābiyāñ ayaañ

paisa agar mile to hamīyat bhī bech deñ

roTī kā aasrā ho to izzat bhī bech deñ

uTThe haiñ jis kī god se aazar vo qaum hai

toḌe haiñ jis ne charḳh se aḳhtar vo qaum hai

palTe haiñ jis ne dahr ke daftar vo qaum hai

paidā kiye haiñ jis ne payambar vo qaum hai

ab kyuuñ sharīk-e-halqa-e-nau-e-bashar nahīñ

insān hī to haiñ ye koī jānvar nahīñ

āḳhir zamāna un ko satā.egā kab talak

kab se jalā rahā hai jalā.egā kab talak

kab se miTā rahā hai miTā.egā kab talak

un ke lahū ko josh na aa.egā kab talak

māyūsiyoñ kī tah meñ junūñ-ḳheziyāñ bhī haiñ

aflās kī sarisht meñ ḳhūñ-reziyāñ bhī haiñ

basti se thoDi dur chaTTanon ke darmiyan

Thahra hua hai KHana-ba-doshon ka karwan

un ki kahin zamin na un ka kahin makan

phirte hain yunhi sham o sahar zer-e-asman

dhup aur abr-o-bar ke mare hue gharib

ye log wo hain jin ko ghulami nahin nasib

is karwan mein tifl bhi hain naujawan bhi hain

buDhe bhi hain mariz bhi hain na-tawan bhi hain

maile phaTe libas mein kuchh dewiyan bhi hain

sab zindagi se tang bhi hain sargiran bhi hain

be-zar zindagi se hain pir o jawan sabhi

altaf-e-shahryar ke hain nauha-KHwan sabhi

mathe pe saKHt-koshi-e-paiham ki dastan

aankhon mein huzn o yas ki ghanghor badliyan

chehron pe tazyana-e-iflas ke nishan

har har ada se bhuk ki betabiyan ayan

paisa agar mile to hamiyat bhi bech den

roTi ka aasra ho to izzat bhi bech den

uTThe hain jis ki god se aazar wo qaum hai

toDe hain jis ne charKH se aKHtar wo qaum hai

palTe hain jis ne dahr ke daftar wo qaum hai

paida kiye hain jis ne payambar wo qaum hai

ab kyun sharik-e-halqa-e-nau-e-bashar nahin

insan hi to hain ye koi jaanwar nahin

aaKHir zamana un ko sataega kab talak

kab se jala raha hai jalaega kab talak

kab se miTa raha hai miTaega kab talak

un ke lahu ko josh na aaega kab talak

mayusiyon ki tah mein junun-KHeziyan bhi hain

aflas ki sarisht mein KHun-reziyan bhi hain