خانہ خراب

دوست جو بچھڑے ہوئے اک دن اچانک مل گئے

دل تو غمگیں تھے مگر چہرے خوشی سے کھل گئے

شاد تھے دونوں کہ قسمت نے ملایا پھر انہیں

بعد مدت دن مسرت کا دکھایا پھر انہیں

دونوں بیٹھے گفتگو دونوں میں جاری ہو گئی

باتوں باتوں میں اچانک بات ایسی ہو گئی

ایک نے جب دوسرے کی خیریت معلوم کی

بولا وہ حالت بتاؤں کیا دل مغموم کی

آپ کو تو علم ہی ہے میرے دو بیٹے بھی تھے

بس انہیں بیٹوں کا غم ہر لمحہ کھاتا ہے مجھے

سن کے وہ صاحب یہ بولے کیسا غم ہے کیا ہوا

کیوں یہ چہرہ آپ کا ہے اس قدر اترا ہوا

بھیڑ میں دنیا کی کیا دونوں ہی بیٹے کھو گئے

یا خدا نخواستہ اللہ کو پیارے ہو گئے

سن کے وہ بولا کہ ایسی تو نہیں ہے کوئی بات

سانحہ کچھ اور ہی گزرا ہے میری جاں کے ساتھ

پہلا بیٹا کر کے شادی بن گیا ہم پر عذاب

دوسرے نے بن کے شاعر کر لیا خانہ خراب