KHabar hai ki nahin

ab sabā kūcha-e-jānāñ meñ guzre hai ki nahīñ

tujh ko is fitna-e-ālam kī ḳhabar hai ki nahīñ

bujh gayā mehr kā fānūs ki raushan hai abhī

ab un āñkhoñ meñ lagāvaT kā asar hai ki nahīñ

ab mere naam kā paḌhtā hai vazīfa koī

ab mirā zikr-e-vafā dard-e-sahar hai ki nahīñ

ab bhī taktī haiñ mirī raah vo kāfir āñkheñ

ab bhī duzdīda nazar jānib-e-dar hai ki nahīñ

chhup ke rātoñ ko mirī yaad meñ rotā hai koī

maujzan aañkh meñ ab ḳhūn-e-jigar hai ki nahīñ

husn ko pursish-e-bīmār kā hai ab bhī ḳhayāl

mehr kī zarra ḳhākī pe nazar hai ki nahīñ

be-ḳhabar mujh ko zamāne se kiyā hai jis ne

kuchh use merī tabāhī kī ḳhabar hai ki nahīñ

khaa.e jaatā hai mujhe dard-e-ġharīb-ul-vatanī

dil par is jān-e-vatan ke bhī asar hai ki nahīñ

'josh' ḳhāmosh bhī ho pūchh rahā hai kyā kyā

kuchh tujhe tāḌne vāloñ kī ḳhabar hai ki nahīñ

ab saba kucha-e-jaanan mein guzre hai ki nahin

tujh ko is fitna-e-alam ki KHabar hai ki nahin

bujh gaya mehr ka fanus ki raushan hai abhi

ab un aankhon mein lagawaT ka asar hai ki nahin

ab mere nam ka paDhta hai wazifa koi

ab mera zikr-e-wafa dard-e-sahar hai ki nahin

ab bhi takti hain meri rah wo kafir aankhen

ab bhi duzdida nazar jaanib-e-dar hai ki nahin

chhup ke raaton ko meri yaad mein rota hai koi

maujzan aankh mein ab KHun-e-jigar hai ki nahin

husn ko pursish-e-bimar ka hai ab bhi KHayal

mehr ki zarra KHaki pe nazar hai ki nahin

be-KHabar mujh ko zamane se kiya hai jis ne

kuchh use meri tabahi ki KHabar hai ki nahin

khae jata hai mujhe dard-e-gharib-ul-watani

dil par is jaan-e-watan ke bhi asar hai ki nahin

'josh' KHamosh bhi ho puchh raha hai kya kya

kuchh tujhe taDne walon ki KHabar hai ki nahin