KHadsha

ye terī jhiil sī āñkhoñ meñ ratjagoñ ke bhañvar

ye tere phuul se chehre pe chāñdnī kī phuvār

ye tere lab ye dayār-e-yaman ke surḳh aqiiq

ye ā.īne sī jabīñ sajda-gāh-e-lail-o-nihār

ye be-niyāz ghane jangaloñ se baal tire

ye phūltī huī sarsoñ kā rang gāloñ par

ye dhaḌkanoñ kī zabāñ bolte hue abrū

kamand Daal rahe haiñ mire ḳhayāloñ par

ye narm narm se hāthoñ kā garm garm sā lams

gudāz jism pe billor kī tahoñ kā samāñ

ye uñgliyāñ ye zamurrad tarāshtī shāḳheñ

kiran kiran tire dāñtoñ pe motiyoñ kā gumāñ

ye chāñdnī meñ dhule paañv jab bhī raqs kareñ

fazā meñ an-gine ghuñgrū chhanakne lagte haiñ

ye paañv jab kisī raste meñ rang barsā.eñ

to mausamoñ ke muqaddar chamakne lagte haiñ

tirī jabīñ pe agar hādsoñ ke naqsh ubhreñ

mizāj-e-gardish-e-daurāñ bhī laḌkhaḌā jaa.e

tū muskurā.e to sub.heñ tujhe salām kareñ

tū ro paḌe to zamāne kī aañkh bhar aa.e

tirā ḳhayāl hai ḳhushbū tirā libās kiran

tū ḳhāk-zād hai yā āsmāñ se utrī hai

maiñ tujh ko dekh ke ḳhud se savāl kartā huuñ

ye mauj-e-rañg zamīñ par kahāñ se utrī hai

maiñ kis tarah tujhe lafzoñ kā pairahan baḳhshūñ

mire hunar kī bulandī to sar-nigūñ hai abhī

tire badan ke ḳhad-o-ḳhāl mere bas meñ nahīñ

maiñ kis tarah tujhe sochūñ yahī junūñ hai abhī

mile haiñ yuuñ to ka.ī rang ke hasīñ chehre

maiñ be-niyāz rahā mauja-e-sabā kī tarah

tirī qasam tirī qurbat ke mausamoñ ke baġhair

zamīñ pe maiñ bhī akelā phirā ḳhudā kī tarah

magar meñ shahr-e-havādis ke sang-zādoñ se

ye aa.ine sā badan kis tarah bachā.ūñgā

mujhe ye Dar hai kisī roz tere karb samet

maiñ ḳhud bhī dukh ke samundar meñ duub jā.uñgā

mujhe ye Dar hai ki tere tabassumoñ kī phuvār

yuñhī vafā kā taqāzā hayā kā taur na ho

tirā badan tirī duniyā hai muntazir jis kī

maiñ sochtā huuñ mirī jaañ vo koī aur na ho

maiñ sochtā huuñ magar sochne se kyā hāsil

ye terī jhiil sī āñkhoñ meñ ratjagoñ ke bhañvar

ye teri jhil si aankhon mein ratjagon ke bhanwar

ye tere phul se chehre pe chandni ki phuwar

ye tere lab ye dayar-e-yaman ke surKH aqiq

ye aaine si jabin sajda-gah-e-lail-o-nihaar

ye be-niyaz ghane jangalon se baal tere

ye phulti hui sarson ka rang galon par

ye dhaDkanon ki zaban bolte hue abru

kamand Dal rahe hain mere KHayalon par

ye narm narm se hathon ka garm garm sa lams

gudaz jism pe billor ki tahon ka saman

ye ungliyan ye zamurrad tarashti shaKHen

kiran kiran tere danton pe motiyon ka guman

ye chandni mein dhule panw jab bhi raqs karen

faza mein an-gine ghungru chhanakne lagte hain

ye panw jab kisi raste mein rang barsaen

to mausamon ke muqaddar chamakne lagte hain

teri jabin pe agar hadson ke naqsh ubhren

mizaj-e-gardish-e-dauran bhi laDkhaDa jae

tu muskurae to subhen tujhe salam karen

tu ro paDe to zamane ki aankh bhar aae

tera KHayal hai KHushbu tera libas kiran

tu KHak-zad hai ya aasman se utri hai

main tujh ko dekh ke KHud se sawal karta hun

ye mauj-e-rang zamin par kahan se utri hai

main kis tarah tujhe lafzon ka pairahan baKHshun

mere hunar ki bulandi to sar-nigun hai abhi

tere badan ke KHad-o-KHal mere bas mein nahin

main kis tarah tujhe sochun yahi junun hai abhi

mile hain yun to kai rang ke hasin chehre

main be-niyaz raha mauja-e-saba ki tarah

teri qasam teri qurbat ke mausamon ke baghair

zamin pe main bhi akela phira KHuda ki tarah

magar mein shahr-e-hawadis ke sang-zadon se

ye aaine sa badan kis tarah bachaunga

mujhe ye Dar hai kisi roz tere karb samet

main KHud bhi dukh ke samundar mein dub jaunga

mujhe ye Dar hai ki tere tabassumon ki phuwar

yunhi wafa ka taqaza haya ka taur na ho

tera badan teri duniya hai muntazir jis ki

main sochta hun meri jaan wo koi aur na ho

main sochta hun magar sochne se kya hasil

ye teri jhil si aankhon mein ratjagon ke bhanwar