KHala aur KHuda

terī raah dekhte dekhte

āñkhoñ ne dekhnā hī chhoḌ diyā hai

afsurdagī haDDiyoñ ke guude meñ Tīseñ maar rahī hai

gosht-post thor-zada zamīn kī tarah barbādī kā naqsha pesh kar rahā hai

lahū shiryānoñ meñ jam kar rah gayā hai

na aane vaale tū kab tak na aa.egā

kā.enātoñ ke ḳhāliq kin āfāq meñ kho gayā hai tū

kaun se āsmān bhā ga.e haiñ tujhe

kaun se ḳhalā khā ga.e haiñ tujhe

ḳhalā hī pasand haiñ to mere dil meñ aa

ki tū ne is se baḌā black-hole to abhī tak paidā nahīñ kiyā

aa ai ḳhudā aa

aa mere dil ke ḳhalā meñ aa

tū agar har jagah hai to merā dil kyuuñ ḳhālī hai

dil ke athāh pātāl meñ DhūñDhtā huuñ aur tujhe paatā nahīñ

sochtā huuñ kahīñ ḳhalā hī ḳhudā na ho

shāyad intizār hī us kī maujūdgī ho

shāyad adam hī us kā vajūd ho

aur nafī us kā isbāt

phir ye soch palTā khātī aur dil ke ḳhalā meñ utar jaatī hai

aur ek āvāra āvāz kī tarah gūñjtī hai

gūñjtī hai gūñjtī hai gūñje hī chalī jaatī hai

aur āhista āhista ek lafz meñ Dhal jaatī hai

ḳhudā

aur āḳhir meñ ek sur rah jaatā hai

aa

duur kahīñ kisī ne darbārī kā alaap chheḌā hai

aa

merī pathrā.ī huī āñkheñ nam ho jaatī haiñ

dil ḳhuun ho kar

āñkhoñ se Tapak paḌtā hai

aur dil ke ḳhalā meñ gūñjtī huī āvāz pukār uThtī hai

maiñ ne to pahle hī kahā thā

yahī ḳhudā hai

teri rah dekhte dekhte

aankhon ne dekhna hi chhoD diya hai

afsurdagi haDDiyon ke gude mein Tisen mar rahi hai

gosht-post thor-zada zamin ki tarah barbaadi ka naqsha pesh kar raha hai

lahu shiryanon mein jam kar rah gaya hai

na aane wale tu kab tak na aaega

kaenaton ke KHaliq kin aafaq mein kho gaya hai tu

kaun se aasman bha gae hain tujhe

kaun se KHala kha gae hain tujhe

KHala hi pasand hain to mere dil mein aa

ki tu ne is se baDa black-hole to abhi tak paida nahin kiya

aa ai KHuda aa

aa mere dil ke KHala mein aa

tu agar har jagah hai to mera dil kyun KHali hai

dil ke athah patal mein DhunDhta hun aur tujhe pata nahin

sochta hun kahin KHala hi KHuda na ho

shayad intizar hi us ki maujudgi ho

shayad adam hi us ka wajud ho

aur nafi us ka isbaat

phir ye soch palTa khati aur dil ke KHala mein utar jati hai

aur ek aawara aawaz ki tarah gunjti hai

gunjti hai gunjti hai gunje hi chali jati hai

aur aahista aahista ek lafz mein Dhal jati hai

KHuda

aur aaKHir mein ek sur rah jata hai

aa

dur kahin kisi ne darbari ka alap chheDa hai

aa

meri pathrai hui aankhen nam ho jati hain

dil KHun ho kar

aankhon se Tapak paDta hai

aur dil ke KHala mein gunjti hui aawaz pukar uThti hai

main ne to pahle hi kaha tha

yahi KHuda hai