KHala ki god

urūs-e-amn ke hoñToñ pe sahmī sahmī sī

machal rahī hai tabassum kī kahkashāñ ban kar

ye zindagī jo kahīñ phuul hai javānī hai

kisī hasīñ kā takallum kisī sanam kā jamāl

kisī kī zulf kā bādal kisī nazar kā ḳhumār

kisī damaktī jabīñ par hayā kī surḳh lakīr

jhukī jhukī sī nigāhoñ kā sehr-e-hosh-rubā

ye zindagī ki jo tahzīb-e-ādamiyyat ko

sajā.e palkoñ pe kājal kī tarah nāzāñ hai

ye zindagī jo tamaddun ko apne siine se

lagā.e raqs-kunāñ hai sahar kī rāhoñ meñ

ye zindagī ki jo insāniyat ke paikar meñ

ḳhalā kī god meñ fitrat se ham-kalām huī

ye kā.enāt ke barbat pe dil-nashīñ ik raag

zamīñ kī maañg kā siñdūr āsmāñ kā suhāg

jilau meñ qāfila-e-rang-o-nūr laa.ī hai

urūs-e-amn kī āġhosh meñ dar aa.ī hai

urus-e-amn ke honTon pe sahmi sahmi si

machal rahi hai tabassum ki kahkashan ban kar

ye zindagi jo kahin phul hai jawani hai

kisi hasin ka takallum kisi sanam ka jamal

kisi ki zulf ka baadal kisi nazar ka KHumar

kisi damakti jabin par haya ki surKH lakir

jhuki jhuki si nigahon ka sehr-e-hosh-ruba

ye zindagi ki jo tahzib-e-adamiyyat ko

sajae palkon pe kajal ki tarah nazan hai

ye zindagi jo tamaddun ko apne sine se

lagae raqs-kunan hai sahar ki rahon mein

ye zindagi ki jo insaniyat ke paikar mein

KHala ki god mein fitrat se ham-kalam hui

ye kaenat ke barbat pe dil-nashin ek rag

zamin ki mang ka sindur aasman ka suhag

jilau mein qafila-e-rang-o-nur lai hai

urus-e-amn ki aaghosh mein dar aai hai