KHala mein bandar

ek ''bono'' naam kā bandar gayā soū-e-ḳhalā

aadmī kā kaam hai bandar kā phañstā hai galā

ye tavaqqo bandaroñ se kar bhalā hogā bhalā

hai yahī bandar ke sar goyā tavīle kī balā

'darvin' ne sach kahā thā us kā ye ehsān hai

aadmī kā pesh-rau ye be-zabāñ haivān hai

gardish-e-daurāñ meñ aayā hai ye kaisā inqalāb

dekhte haiñ ab ḳhalā meñ baiTh kar bandar bhī ḳhvāb

ḳhvāb kyā hogā yahī hogā ki ham haiñ lā-javāb

is binā pe aadmī kā bhī lagā.eñge hisāb

kyā ḳhalā meñ us pe guzrī hogī ai saaqī na pūchh

''kāv-kāv-e-saḳht-jānī haa.e tanhā.ī na pūchch''

ye to scientist hī jāneñ unhī ko hai ḳhabar

is ḳhalā ke ḳhvāb meñ bandar ko kyā aayā nazar

us ko kyā ma.alūm us kā hai ḳhalā meñ kyuuñ safar

ye samajhtā hogā maiñ baiThā huuñ ūñchī Daal par

sochtā hogā ki har ḳhurd-o-kalāñ chakkar meñ hai

ye zamīñ chakkar meñ hai ye āsmāñ chakkar meñ hai

ḳhvāh chhoTī zaat kā bandar hai yā Dhabbūs hai

jis ne bhejā hai ḳhalā meñ us ko vo to ruus hai

vo zamīñ vāloñ kā ik bhejā huā jāsūs hai

DugDugī kī shakl kī ashyā se vo mānūs hai

chūñki aadhī DugDugī kī shakl meñ hai capsule

nāchte haiñ DugDugī ke bal pe bandar yā usuul

duur se shāyad zamīñ ko DugDugī samjhā hai vo

nāchte rahne ko shāyad zindagī samjhā hai vo

tairte rahnā ḳhalā meñ dil-lagī samjhā hai vo

aadmī ḳhud ko ze-fart-e-sādgī samjhā hai vo

baat ''bono'' kī ḳhalā meñ dekhiye kaise bane

kyā sitāre shab meñ aate haiñ nazar us ko chane

ek bono nam ka bandar gaya sou-e-KHala

aadmi ka kaam hai bandar ka phansta hai gala

ye tawaqqo bandaron se kar bhala hoga bhala

hai yahi bandar ke sar goya tawile ki bala

'darwin' ne sach kaha tha us ka ye ehsan hai

aadmi ka pesh-rau ye be-zaban haiwan hai

gardish-e-dauran mein aaya hai ye kaisa inqalab

dekhte hain ab KHala mein baiTh kar bandar bhi KHwab

KHwab kya hoga yahi hoga ki hum hain la-jawab

is bina pe aadmi ka bhi lagaenge hisab

kya KHala mein us pe guzri hogi ai saqi na puchh

kaw-kaw-e-saKHt-jaani hae tanhai na puchch

ye to scientist hi jaanen unhi ko hai KHabar

is KHala ke KHwab mein bandar ko kya aaya nazar

us ko kya malum us ka hai KHala mein kyun safar

ye samajhta hoga main baiTha hun unchi Dal par

sochta hoga ki har KHurd-o-kalan chakkar mein hai

ye zamin chakkar mein hai ye aasman chakkar mein hai

KHwah chhoTi zat ka bandar hai ya Dhabbus hai

jis ne bheja hai KHala mein us ko wo to rus hai

wo zamin walon ka ek bheja hua jasus hai

DugDugi ki shakl ki ashya se wo manus hai

chunki aadhi DugDugi ki shakl mein hai capsule

nachte hain DugDugi ke bal pe bandar ya usul

dur se shayad zamin ko DugDugi samjha hai wo

nachte rahne ko shayad zindagi samjha hai wo

tairte rahna KHala mein dil-lagi samjha hai wo

aadmi KHud ko ze-fart-e-sadgi samjha hai wo

baat bono ki KHala mein dekhiye kaise bane

kya sitare shab mein aate hain nazar us ko chane