KHalish-e-tassur

ḳhāmosh huā bheḌoñ kā gallā chalte chalte mimyā kar

jā pahuñchā shāyad baaḌe meñ buusī raste meñ phailā kar

chup-chāp khaḌā hai duur udhar vo jañgal kaalī chīloñ kā

sarsabz pahāḌoñ ko pur-haul banāne vaalī chīloñ kā

āvāz nahīñ aatī ab jhiil kī jānib se murġhābī kī

sunsān fazā be-jān havā meñ larzāñ ruuh ḳhamoshī kī

yuuñ laa.ī dosh pe laash sī kyā rañgīñ din kī barbādī kī

ye shaam ye gahrī shaam ye har lahza baḌhtī huī tārīkī!

qudarat ke sukūt-e-mujassam kī is haibat-zā ārā.ish se

vaadī ke zarre zarre kī ham-āhañgī kī numā.ish se

har naqsh-e-shajar har fīl-numā patthar duniyā hai tilismoñ kī

had hī nahīñ aatī koī nazar us turfa-fusūñ kī qismoñ kī

har shai par ḳhvāb sā taarī hai aur maiñ huuñ sarf-e-be-ḳhvābī

lene hī nahīñ detī dam mujh ko merī fitrat-e-sīmābī

ai kaash kabhī kam kar saktī mere bhī dil kī betābī

ye shaam ye gahrī shaam ye har lahza baḌhtī huī tārīkī

maiñ masnūāt kā parvārda balki insān bhī masnūī

merā sāmān bhī masnūī merā īmān bhī masnūī

basne vaalā maidānoñ ke hañgāma-parvar shahroñ kā

be-rabt sukūñ se nā-vāqif aur shorīda-sar shahroñ kā

maiñ qudarat ke asrār-o-rumūz-e-pinhāñ se āgāh kahāñ

is andhyār ke athāh samundar kī mire dil meñ chaah kahāñ

aur mujh ko dikhātī hai nūr-e-haqīqat ke jalvaoñ kī raah kahāñ

ye shaam ye gahrī shaam ye har lahza baḌhtī huī tārīkī

ye manzar ḳhush-ā.ind to haiñ maiñ in se magar kyuuñ Dartā huuñ

kyuuñ in kī dil-āvezī ko vahshat-nāk tasavvur kartā huuñ

kyuuñ mujh ko mayassar sañg o shajar kā sā bhī sukūn-e-qalb nahīñ

kyuuñ merī duniyā is duniyā se jā ke basī hai duur kahīñ

kyuuñ maiñ ne Daalā hai apne hī jī ko aap halākat meñ

kyuuñ ho hī nahīñ jaatā maiñ ḳhud paivasta jahān-e-qudarat meñ

kyuuñ le hī nahīñ letī mujh ko apnī āġhosh kī vus.at meñ

ye shaam ye gahrī tārīkī ye har lahza baḌhtī huī tārīkī

KHamosh hua bheDon ka galla chalte chalte mimya kar

ja pahuncha shayad baDe mein busi raste mein phaila kar

chup-chap khaDa hai dur udhar wo jangal kali chilon ka

sarsabz pahaDon ko pur-haul banane wali chilon ka

aawaz nahin aati ab jhil ki jaanib se murghabi ki

sunsan faza be-jaan hawa mein larzan ruh KHamoshi ki

yun lai dosh pe lash si kya rangin din ki barbaadi ki

ye sham ye gahri sham ye har lahza baDhti hui tariki!

qudarat ke sukut-e-mujassam ki is haibat-za aaraish se

wadi ke zarre zarre ki ham-ahangi ki numaish se

har naqsh-e-shajar har fil-numa patthar duniya hai tilismon ki

had hi nahin aati koi nazar us turfa-fusun ki qismon ki

har shai par KHwab sa tari hai aur main hun sarf-e-be-KHwabi

lene hi nahin deti dam mujh ko meri fitrat-e-simabi

ai kash kabhi kam kar sakti mere bhi dil ki betabi

ye sham ye gahri sham ye har lahza baDhti hui tariki

main masnuat ka parwarda balki insan bhi masnui

mera saman bhi masnui mera iman bhi masnui

basne wala maidanon ke hangama-parwar shahron ka

be-rabt sukun se na-waqif aur shorida-sar shahron ka

main qudarat ke asrar-o-rumuz-e-pinhan se aagah kahan

is andhyar ke athah samundar ki mere dil mein chah kahan

aur mujh ko dikhati hai nur-e-haqiqat ke jalwaon ki rah kahan

ye sham ye gahri sham ye har lahza baDhti hui tariki

ye manzar KHush-aind to hain main in se magar kyun Darta hun

kyun in ki dil-awezi ko wahshat-nak tasawwur karta hun

kyun mujh ko mayassar sang o shajar ka sa bhi sukun-e-qalb nahin

kyun meri duniya is duniya se ja ke basi hai dur kahin

kyun main ne Dala hai apne hi ji ko aap halakat mein

kyun ho hi nahin jata main KHud paiwasta jahan-e-qudarat mein

kyun le hi nahin leti mujh ko apni aaghosh ki wusat mein

ye sham ye gahri tariki ye har lahza baDhti hui tariki