KHalish

terī tasvīr tire husn kā ye aks-e-jamīl

tere hoñToñ kā tabassum tirī āñkhoñ kā surūr

tere is nuqra.ī māthe pe tilā.ī jhūmar

chāñd kī kirnoñ meñ bahtā huā ik mauja-e-nūr

ye tire marmarīñ baazū pe ghanerī zulfeñ

aaj sākit haiñ pas-e-parda-e-tasvīr magar

chand mub.ham se nuqūsh aur ye dhuñdle ḳhāke

tū ne bheje haiñ ki ho jā.egī taskīn-e-nazar

kaash ye TeḌhī lakīreñ yahī dhuñdle ḳhāke

paikar-e-hastī ke sāñche meñ agar Dhal sakte

merī maġhmūm tamannāoñ ke ḳhāmosh charāġh

terī sāñsoñ kī harārat se kabhī jal sakte

teri taswir tere husn ka ye aks-e-jamil

tere honTon ka tabassum teri aankhon ka surur

tere is nuqrai mathe pe tilai jhumar

chand ki kirnon mein bahta hua ek mauja-e-nur

ye tere marmarin bazu pe ghaneri zulfen

aaj sakit hain pas-e-parda-e-taswir magar

chand mubham se nuqush aur ye dhundle KHake

tu ne bheje hain ki ho jaegi taskin-e-nazar

kash ye TeDhi lakiren yahi dhundle KHake

paikar-e-hasti ke sanche mein agar Dhal sakte

meri maghmum tamannaon ke KHamosh charagh

teri sanson ki hararat se kabhi jal sakte