khanakti miTTi mein raushni ki

khanaktī miTTī meñ raushnī kī

milāvaToñ se banī huī ho

kiran ho yā'nī safed shaffāf nuur se tum

janī huī ho

ye rang-o-rā'nā.ī aur mohabbat tire liye hai

tamām phūloñ kī ye 'aqīdat tire liye hai

sunā hai tere janam pe janmī ga.ī thī ḳhushbū

guloñ ko tere janam pe tohfa diyā gayā thā

sitāre tere siyāh bāloñ ke vāste haiñ

sunā hai ye chāñd tere māthe pe ek Tiikā lagā huā thā

tujhe banā ke ḳhudā-e-rabb-e-jamāl kitnā hī ḳhush huā thā

har ik farishta kamāl-e-hairat se tere chehre ko dekhtā thā

sunā hai jharne tumhārī āvāz ke ta'āqub meñ phūTte haiñ

sunā hai dariyā tumhāre pairoñ ko chhū ke mīThe bane hue haiñ

maiñ sun rahā huuñ maiñ sochtā huuñ ki tū bhī kyā hai

kisī kī minnat hai yā du'ā hai

guzishta ikkīs saal tum ne kahāñ bitā.e

vo kaun duniyā thī jo tumhāre hasīn qadmoñ kā lams le ke mahak rahī thī

vo koī bhī the magar balā ke nasīb vaale the

maiñ sochtā huuñ ki aane vaale janam pe agle baras na jaane

ye husn terā kahāñ khulegā

vo kaun ḳhush-baḳht shaḳhs hogā

tujhe kahegā

janam mubārak

vo jo bhī hogā ḳhudā salāmat rakhe sabhī ko

ham aise andhe faqīr lamhoñ meñ jī rahe haiñ

aur is ghaḌī tum faqat hamārī ho husn-zādī

ham aise lamhoñ meñ sadiyāñ jiine ke fan meñ māhir

tumheñ tumhāre janam ke din par hasīn ghaḌiyoñ meñ kah rahe haiñ

hamārī āñkhoñ ko dād-e-dīdār dene vaalī hasīn devī

tumheñ mohabbat ke is jazīre pe aane vaalī ghaḌī mubārak

jo tum ko dekheñ jo tum ko chāheñ jo tum ko socheñ

unheñ ye do din kī zindagānī baḌī mubārak

khanakti miTTi mein raushni ki

milawaTon se bani hui ho

kiran ho ya'ni safed shaffaf nur se tum

jani hui ho

ye rang-o-ra'nai aur mohabbat tere liye hai

tamam phulon ki ye 'aqidat tere liye hai

suna hai tere janam pe janmi gai thi KHushbu

gulon ko tere janam pe tohfa diya gaya tha

sitare tere siyah baalon ke waste hain

suna hai ye chand tere mathe pe ek Tika laga hua tha

tujhe bana ke KHuda-e-rabb-e-jamal kitna hi KHush hua tha

har ek farishta kamal-e-hairat se tere chehre ko dekhta tha

suna hai jharne tumhaari aawaz ke ta'aqub mein phuTte hain

suna hai dariya tumhaare pairon ko chhu ke miThe bane hue hain

main sun raha hun main sochta hun ki tu bhi kya hai

kisi ki minnat hai ya du'a hai

guzishta ikkis sal tum ne kahan bitae

wo kaun duniya thi jo tumhaare hasin qadmon ka lams le ke mahak rahi thi

wo koi bhi the magar bala ke nasib wale the

main sochta hun ki aane wale janam pe agle baras na jaane

ye husn tera kahan khulega

wo kaun KHush-baKHt shaKHs hoga

tujhe kahega

janam mubarak

wo jo bhi hoga KHuda salamat rakhe sabhi ko

hum aise andhe faqir lamhon mein ji rahe hain

aur is ghaDi tum faqat hamari ho husn-zadi

hum aise lamhon mein sadiyan jine ke fan mein mahir

tumhein tumhaare janam ke din par hasin ghaDiyon mein kah rahe hain

hamari aankhon ko dad-e-didar dene wali hasin dewi

tumhein mohabbat ke is jazire pe aane wali ghaDi mubarak

jo tum ko dekhen jo tum ko chahen jo tum ko sochen

unhen ye do din ki zindagani baDi mubarak