khanDar aur phul

makāñ jal chukā hai

khañDar hai siyāhī hai bujhtī huī raakh kī siskiyāñ haiñ

mirī aañkh pur-nam hai

chup-chāp gum-sum khaḌā huuñ yahāñ par

mire āñsuoñ meñ

tasāvīr haiñ

māzī-o-hāl kī

vaqt kī manziloñ kī

mire zehn meñ dāstāñ hai

zamāne ke banñe bigaḌne kī

tāmīr-o-taḳhrīb kī dhaḌkanoñ kī

mire kaan meñ gūñjtī haiñ vo narm aur shīrīñ sadā.eñ

jinheñ aag ne is makān ke khañDar meñ fanā kar diyā hai

mohabbat kī taqdīs

ma.asūm sham.oñ ke ashkoñ kī garmī

dho.eñ kī taḌaptī huī dhāriyāñ

un kā paiġhām ban kar

fazāoñ meñ shāyad bhaTakne lagī haiñ

mirī aañkh pur-nam hai phir bhī maiñ ḳhush huuñ

mire paas ḳhvāboñ kī ma.asūm ThanDak

irādoñ ke raushan sitāroñ kī narmī

taḳhayyul kī bahtī huī naġhmagī hai

maiñ yādoñ ke malbe pe taḳhlīq kā phuul le kar khaḌā huuñ

makan jal chuka hai

khanDar hai siyahi hai bujhti hui rakh ki siskiyan hain

meri aankh pur-nam hai

chup-chap gum-sum khaDa hun yahan par

mere aansuon mein

tasawir hain

mazi-o-haal ki

waqt ki manzilon ki

mere zehn mein dastan hai

zamane ke banne bigaDne ki

tamir-o-taKHrib ki dhaDkanon ki

mere kan mein gunjti hain wo narm aur shirin sadaen

jinhen aag ne is makan ke khanDar mein fana kar diya hai

mohabbat ki taqdis

masum shamon ke ashkon ki garmi

dhoen ki taDapti hui dhaariyan

un ka paigham ban kar

fazaon mein shayad bhaTakne lagi hain

meri aankh pur-nam hai phir bhi main KHush hun

mere pas KHwabon ki masum ThanDak

iradon ke raushan sitaron ki narmi

taKHayyul ki bahti hui naghmagi hai

main yaadon ke malbe pe taKHliq ka phul le kar khaDa hun