khanDar

maiñ jab bhī tere ghar ke paas se ho kar guzartā huuñ

mujhe khoī huī ra.anā.iyāñ āvāz detī haiñ

tirī yādeñ tirī parchhā.iyāñ āvāz detī haiñ

ye qufl-e-zang-ālūda ye ghar ke band darvāze

tire tark-e-vatan kā dukh-bharā afsāna kahte haiñ

muñDeroñ par ye lahrāte hue pur-haul sannāTe

shikast-e-ḳhvāb kī rūdād-e-ġham dohrāte rahte haiñ

yahāñ har shaam mehrāboñ meñ uḌtī haiñ abābīleñ

yahāñ pichhle pahar shabnam ke aañsū roz bahte haiñ

shabeñ aa kar guzar jaatī haiñ sham.eñ tak nahīñ jaltīñ

sahar aa kar chalī jaatī hai ārā.ish nahīñ hotī

pas-e-parda kisī āvāz ke ghuñghrū nahīñ bajte

pas-e-chilman kisī ruḳhsār kī tābish nahīñ hotī

pas-e-dīvār lahrāte nahīñ ab reshmī āñchal

pas-e-rauzan nishāt-o-kaif kī bārish nahīñ hotī

vo talḳhī shiddat-e-jazbāt ne bhar dī hai rag-rag meñ

ki tere ġham meñ royā huuñ to ḳhud par muskurāyā huuñ

jo duniyā kho ga.ī maiñ huuñ usī duniyā meñ āvāra

jo sham.eñ nazr-e-tūfāñ ho ga.iiñ maiñ un kā saayā huuñ

na jaane ajnabī bastī meñ terā haal kyā hogā

maiñ apne shahr kī galiyoñ meñ huuñ lekin parāyā huuñ

dayār-e-ġhair meñ ab qaid haiñ vo reshmī jalve

jinhoñ ne merī rāhoñ meñ mah-o-anjum bikhere haiñ

maiñ samjhā thā mirī rātoñ meñ chamkeñge tire aariz

maiñ samjhā thā shahānī chūḌiyoñ ke giit mere haiñ

magar taqsīm ne rūhoñ ko bhī taqsīm kar Daalā

yahāñ bhī ghup añdhere haiñ vahāñ bhī ghup añdhere haiñ

maiñ jab bhī tere ghar ke paas se ho kar guzartā huuñ

mujhe khoī huī ra.anā.iyāñ āvāz detī haiñ

tirī yādeñ tirī parchhā.iyāñ āvāz detī haiñ

main jab bhi tere ghar ke pas se ho kar guzarta hun

mujhe khoi hui ranaiyan aawaz deti hain

teri yaaden teri parchhaiyan aawaz deti hain

ye qufl-e-zang-aluda ye ghar ke band darwaze

tere tark-e-watan ka dukh-bhara afsana kahte hain

munDeron par ye lahraate hue pur-haul sannaTe

shikast-e-KHwab ki rudad-e-gham dohraate rahte hain

yahan har sham mehrabon mein uDti hain ababilen

yahan pichhle pahar shabnam ke aansu roz bahte hain

shaben aa kar guzar jati hain shamen tak nahin jaltin

sahar aa kar chali jati hai aaraish nahin hoti

pas-e-parda kisi aawaz ke ghunghru nahin bajte

pas-e-chilman kisi ruKHsar ki tabish nahin hoti

pas-e-diwar lahraate nahin ab reshmi aanchal

pas-e-rauzan nishat-o-kaif ki barish nahin hoti

wo talKHi shiddat-e-jazbaat ne bhar di hai rag-rag mein

ki tere gham mein roya hun to KHud par muskuraya hun

jo duniya kho gai main hun usi duniya mein aawara

jo shamen nazr-e-tufan ho gain main un ka saya hun

na jaane ajnabi basti mein tera haal kya hoga

main apne shahr ki galiyon mein hun lekin paraya hun

dayar-e-ghair mein ab qaid hain wo reshmi jalwe

jinhon ne meri rahon mein mah-o-anjum bikhere hain

main samjha tha meri raaton mein chamkenge tere aariz

main samjha tha shahani chuDiyon ke git mere hain

magar taqsim ne ruhon ko bhi taqsim kar Dala

yahan bhi ghup andhere hain wahan bhi ghup andhere hain

main jab bhi tere ghar ke pas se ho kar guzarta hun

mujhe khoi hui ranaiyan aawaz deti hain

teri yaaden teri parchhaiyan aawaz deti hain