KHarabaat

sunahrī shaam hai saaqī

shafaq gulfām hai saaqī

baḌhā sāġhar ki mai-noshī

mubārak kaam hai saaqī

haiñ ḳhālī jis qadar pyāle

sharāb-e-surḳh se bhar de

tujhe kyā zarf-e-zarrīñ yā

sifālī jaam hai saaqī

ye ḳhum kyoñ kyoñ ye paimāna

luTā de saarā mai-ḳhāna

masarrat jis ko kahte haiñ

matā’-e-‘ām hai saaqī

na hushyārī na be-hoshī

ho kuchh mastī kuchh āgāhī

ḳhirad-mandān-e-‘ālam kā

yahī paiġhām hai saaqī

gale milte the jo bāham

haiñ ḳhanjar bar-gulū paiham

lab-e-e’jāz bhī goyā

lab-e-dushnām hai saaqī

ba-har-jā hirs ke phande

havasnākī ke sab bande

giraftār-e-ḳham-e-kākul

'abas badnām hai saaqī

‘uqāb-e-charḳh-paimā ho

humā ho yā ki 'anqā ho

riyāz-e-rang-o-nik.hat meñ

asīr-e-dām hai saaqī

ruḳh-o-gesū kā nazzāra

muraqqa' nūr-o-zulmat kā

mukaddar sub.h yā shāyad

munavvar shaam hai saaqī

shabāb o husn dilbar kā

tamāshā hai ghaḌī-bhar kā

davāmī nashsha-e-ulfat

ḳhayāl-e-ḳhām hai saaqī

yahī ik lamha-e-'ishrat

yahī ik 'aish kī sā'at

yahī āġhāz hastī kā

yahī anjām hai saaqī

talāsh-e-be-ḳhudī meñ ab

huuñ vaqf-e-bāda roz-o-shab

isī ik kaam ke laa.iq

dil-e-nākām hai saaqī

idhar hai kulfat-e-māzī

udhar ummīd fardā kī

'ajab bīm-o-rajā hai kuchh

'ajab hangām hai saaqī

bachā aafat se har dil ko

nigāh-e-bad se mahfil ko

ki jo tīr-e-nazar hai yaañ

vo ḳhūñ-āshām hai saaqī

kalīd-e-maḳhzan-e-‘irfāñ

naved-e-rauza-e-rizvāñ

qadah kī sham' raushan rakh

shab-e-auhām hai saaqī

kalīsā ho ki mandir ho

dar-e-masjid ki mimbar ho

na ho gar justujū-e-haq

ġhalat iqdām hai saaqī

tire ratl-e-girāñ kī hai

jo qīmat zindagī sī shai

to naqd-e-hosh-o-dīn-o-dil

tirā in'ām hai saaqī

jahāñ tū jalva-farmā ho

jahāñ tū chehra-ārā ho

dam-e-rāhat se vaañ ḳhush-tar

dil-e-ālām hai saaqī

surūr-e-jāvedānī tū

faroġh-e-zindagānī tū

bahār-e-ārzū tujh bin

barā.e naam hai saaqī

nirā sā hai jahāñ kab se

hai pyāsā kārvāñ kab se

qarīb-e-chashma-e-haivāñ

ye tishna-kām hai saaqī

hayāt-e-tāza kā sadqa

pilā de jur'a par jur'a

shagūfe nau-shagufta gul

saman-andām hai saaqī

bayābāñ meñ haiñ barsāteñ

chaman meñ chāñdnī rāteñ

zamīñ sahbā-e-mausam se

ba-rang-e-jām hai saaqī

ḳhushī ke chahchahe har-sū

hañsī aur qahqahe har-sū

diloñ meñ kis liye āḳhir

ġham-e-ayyām hai saaqī

nasheman shāḳh-e-tūbā par

banā sakte nahīñ taa.ir

ki baazū par shikasta aur

falak-ras baam hai saaqī

'atā ho 'azm hikmat ko

bulandī fikr-o-himmat ko

to rāh-e-jāda-e-maqsad

faqat ik gaam hai saaqī

sunahri sham hai saqi

shafaq gulfam hai saqi

baDha saghar ki mai-noshi

mubarak kaam hai saqi

hain KHali jis qadar pyale

sharab-e-surKH se bhar de

tujhe kya zarf-e-zarrin ya

sifali jam hai saqi

ye KHum kyon kyon ye paimana

luTa de sara mai-KHana

masarrat jis ko kahte hain

mata’-e-‘am hai saqi

na hushyari na be-hoshi

ho kuchh masti kuchh aagahi

KHirad-mandan-e-‘alam ka

yahi paigham hai saqi

gale milte the jo baham

hain KHanjar bar-gulu paiham

lab-e-e’jaz bhi goya

lab-e-dushnam hai saqi

ba-har-ja hirs ke phande

hawasnaki ke sab bande

giraftar-e-KHam-e-kakul

'abas badnam hai saqi

‘uqab-e-charKH-paima ho

huma ho ya ki 'anqa ho

riyaz-e-rang-o-nikhat mein

asir-e-dam hai saqi

ruKH-o-gesu ka nazzara

muraqqa' nur-o-zulmat ka

mukaddar subh ya shayad

munawwar sham hai saqi

shabab o husn dilbar ka

tamasha hai ghaDi-bhar ka

dawami nashsha-e-ulfat

KHayal-e-KHam hai saqi

yahi ek lamha-e-'ishrat

yahi ek 'aish ki sa'at

yahi aaghaz hasti ka

yahi anjam hai saqi

talash-e-be-KHudi mein ab

hun waqf-e-baada roz-o-shab

isi ek kaam ke laiq

dil-e-nakaam hai saqi

idhar hai kulfat-e-mazi

udhar ummid farda ki

'ajab bim-o-raja hai kuchh

'ajab hangam hai saqi

bacha aafat se har dil ko

nigah-e-bad se mahfil ko

ki jo tir-e-nazar hai yan

wo KHun-asham hai saqi

kalid-e-maKHzan-e-‘irfan

nawed-e-rauza-e-rizwan

qadah ki sham' raushan rakh

shab-e-auham hai saqi

kalisa ho ki mandir ho

dar-e-masjid ki mimbar ho

na ho gar justuju-e-haq

ghalat iqdam hai saqi

tere ratl-e-giran ki hai

jo qimat zindagi si shai

to naqd-e-hosh-o-din-o-dil

tera in'am hai saqi

jahan tu jalwa-farma ho

jahan tu chehra-ara ho

dam-e-rahat se wan KHush-tar

dil-e-alam hai saqi

surur-e-jawedani tu

farogh-e-zindagani tu

bahaar-e-arzu tujh bin

barae nam hai saqi

nira sa hai jahan kab se

hai pyasa karwan kab se

qarib-e-chashma-e-haiwan

ye tishna-kaam hai saqi

hayat-e-taza ka sadqa

pila de jur'a par jur'a

shagufe nau-shagufta gul

saman-andam hai saqi

bayaban mein hain barsaten

chaman mein chandni raaten

zamin sahba-e-mausam se

ba-rang-e-jam hai saqi

KHushi ke chahchahe har-su

hansi aur qahqahe har-su

dilon mein kis liye aaKHir

gham-e-ayyam hai saqi

nasheman shaKH-e-tuba par

bana sakte nahin tair

ki bazu par shikasta aur

falak-ras baam hai saqi

'ata ho 'azm hikmat ko

bulandi fikr-o-himmat ko

to rah-e-jada-e-maqsad

faqat ek gam hai saqi