خرابات

سنہری شام ہے ساقی

شفق گلفام ہے ساقی

بڑھا ساغر کہ مے نوشی

مبارک کام ہے ساقی

ہیں خالی جس قدر پیالے

شراب سرخ سے بھر دے

تجھے کیا ظرف زریں یا

سفالی جام ہے ساقی

یہ خم کیوں کیوں یہ پیمانہ

لٹا دے سارا مے خانہ

مسرت جس کو کہتے ہیں

متاع عام ہے ساقی

نہ ہشیاری نہ بے ہوشی

ہو کچھ مستی کچھ آگاہی

خرد مندان عالم کا

یہی پیغام ہے ساقی

گلے ملتے تھے جو باہم

ہیں خنجر بر گلو پیہم

لب اعجاز بھی گویا

لب دشنام ہے ساقی

بہ ہر جا حرص کے پھندے

ہوس ناکی کے سب بندے

گرفتار خم کاکل

عبث بدنام ہے ساقی

عقاب چرخ پیما ہو

ہما ہو یا کہ عنقا ہو

ریاض رنگ و نکہت میں

اسیر دام ہے ساقی

رخ و گیسو کا نظارہ

مرقع نور و ظلمت کا

مکدر صبح یا شاید

منور شام ہے ساقی

شباب و حسن دلبر کا

تماشا ہے گھڑی بھر کا

دوامی نشۂ الفت

خیال خام ہے ساقی

یہی اک لمحۂ عشرت

یہی اک عیش کی ساعت

یہی آغاز ہستی کا

یہی انجام ہے ساقی

تلاش بے خودی میں اب

ہوں وقف بادہ روز و شب

اسی اک کام کے لائق

دل ناکام ہے ساقی

ادھر ہے کلفت ماضی

ادھر امید فردا کی

عجب بیم و رجا ہے کچھ

عجب ہنگام ہے ساقی

بچا آفت سے ہر دل کو

نگاہ بد سے محفل کو

کہ جو تیر نظر ہے یاں

وہ خوں آشام ہے ساقی

کلید مخزن عرفاں

نوید روضۂ رضواں

قدح کی شمع روشن رکھ

شب اوہام ہے ساقی

کلیسا ہو کہ مندر ہو

در مسجد کہ منبر ہو

نہ ہو گر جستجوئے حق

غلط اقدام ہے ساقی

ترے رطل گراں کی ہے

جو قیمت زندگی سی شے

تو نقد ہوش و دین و دل

ترا انعام ہے ساقی

جہاں تو جلوہ فرما ہو

جہاں تو چہرہ آرا ہو

دام راحت سے واں خوشتر

دل آلام ہے ساقی

سرور جاودانی تو

فروغ زندگانی تو

بہار آرزو تجھ بن

برائے نام ہے ساقی

نرا سا ہے جہاں کب سے

ہے پیاسا کارواں کب سے

قریب چشمۂ حیواں

یہ تشنہ کام ہے ساقی

حیات تازہ کا صدقہ

پلا دے جرعہ پر جرعہ

شگوفے نو شگفتہ گل

سمن اندام ہے ساقی

بیاباں میں ہیں برساتیں

چمن میں چاندنی راتیں

زمیں صہبائے موسم سے

برنگ جام ہے ساقی

خوشی کے چہچہے ہر سو

ہنسی اور قہقہے ہر سو

دلوں میں کس لئے آخر

غم ایام ہے ساقی

نشیمن شاخ طوبیٰ پر

بنا سکتے نہیں طائر

کہ بازو پر شکستہ اور

فلک رس بام ہے ساقی

عطا ہو عزم حکمت کو

بلندی فکر و ہمت کو

تو راہ جادۂ مقصد

فقط اک گام ہے ساقی