KHargosh ki sarguzisht

raqs

shaam khaḌī hai

bhūrī jhāḌiyoñ,

piilī ghāsoñ ke ḳhemoñ se bāhar niklo

narm havā.eñ bāloñ kī jhālar se guzartī

lambe lambe kānoñ meñ ḳhargoshī kartī haiñ

surḳh koñpleñ

sabz pattiyāñ

saañp chhatriyāñ...

jañgal meñ godām khulā hai pāgal

apne bekal nathnoñ meñ

is ḳhush-bū kā chhallā Daal ke raqs karo

har ḳhatre ko chakma do

chor chaTānoñ ke nīche

sau darvāze haiñ

kīsar phūloñ ke bistar haiñ

dhuum machāne ko saarā maidān paḌā hai

maut

aur tum apne shabistāñ chhoḌ kar

is bayābāñ ke añdhere rāste par

ḳhuun meñ lat-pat paḌe ho

is kī āḳhir kyā zarūrat thī

vahāñ par tum jahāñ ke hukmarāñ the

kyā nahīñ thaa?

ḳhvāb kī dīvār kyūñ-kar paar karnā chāhte the

is tajassus meñ kashish kaisī hai

nā-mālūm ko tasḳhīr kī tamannā kis liye hai

is purānī ārzū-mandī meñ kyā hai

is ḳhayābāñ ke aqab meñ

vo jo pur-asrār duniyā.eñ basī haiñ

vo hameñ kyuuñ khīñchtī haiñ?

raqs

sham khaDi hai

bhuri jhaDiyon,

pili ghason ke KHemon se bahar niklo

narm hawaen baalon ki jhaalar se guzarti

lambe lambe kanon mein KHargoshi karti hain

surKH konplen

sabz pattiyan

sanp chhatriyan

jangal mein godam khula hai pagal

apne bekal nathnon mein

is KHush-bu ka chhalla Dal ke raqs karo

har KHatre ko chakma do

chor chaTanon ke niche

sau darwaze hain

kisar phulon ke bistar hain

dhum machane ko sara maidan paDa hai

maut

aur tum apne shabistan chhoD kar

is bayaban ke andhere raste par

KHun mein lat-pat paDe ho

is ki aaKHir kya zarurat thi

wahan par tum jahan ke hukmaran the

kya nahin tha?

KHwab ki diwar kyun-kar par karna chahte the

is tajassus mein kashish kaisi hai

na-malum ko tasKHir ki tamanna kis liye hai

is purani aarzu-mandi mein kya hai

is KHayaban ke aqab mein

wo jo pur-asrar duniyaen basi hain

wo hamein kyun khinchti hain?