KHasara sare jiwan ka

abhī mat chheḌnā mujh ko

abhī har zaḳhm kaarī hai

abhī us kī judā.ī kī faqat ajrak utārī hai

abhī sadme uThāne haiñ

ka.ī lamhe mohabbat ke aziyyat meñ bitāne haiñ

mire har zaḳhm ko hamdam abhī nāsūr honā hai

baḌī lambī masāfat hai

thakan se chuur honā hai

abhī palkoñ ko chūmeñge tumhārī yaad ke jugnū

tumhāre qurb kī ḳhushbū tumhārī baat kā jaadū

abhī kuchh bhī nahīñ bigḌā

abhī kuchh bhī nahīñ badlā

abhī to saañs kī lai par har ik ḳhvāhish machaltī hai

abhī to mausam-e-hijrāñ gumāñ kī ibtidā meñ hai

abhī band-e-qabā meñ hai

abhī to nā-tamāmī kā samundar paar karnā hai

abhī ḳhud se ulajhnā hai

abhī ḳhud se mukarnā hai

abhī hamrāh rakhnā hai ḳhasārā saare jīvan kā

shajar dil meñ ugānā hai

ziyāñ ke zard sāvan kā

abhi mat chheDna mujh ko

abhi har zaKHm kari hai

abhi us ki judai ki faqat ajrak utari hai

abhi sadme uThane hain

kai lamhe mohabbat ke aziyyat mein bitane hain

mere har zaKHm ko hamdam abhi nasur hona hai

baDi lambi masafat hai

thakan se chur hona hai

abhi palkon ko chumenge tumhaari yaad ke jugnu

tumhaare qurb ki KHushbu tumhaari baat ka jadu

abhi kuchh bhi nahin bigDa

abhi kuchh bhi nahin badla

abhi to sans ki lai par har ek KHwahish machalti hai

abhi to mausam-e-hijran guman ki ibtida mein hai

abhi band-e-qaba mein hai

abhi to na-tamami ka samundar par karna hai

abhi KHud se ulajhna hai

abhi KHud se mukarna hai

abhi hamrah rakhna hai KHasara sare jiwan ka

shajar dil mein ugana hai

ziyan ke zard sawan ka