خسارہ سارے جیون کا

ابھی مت چھیڑنا مجھ کو

ابھی ہر زخم کاری ہے

ابھی اس کی جدائی کی فقط اجرک اتاری ہے

ابھی صدمے اٹھانے ہیں

کئی لمحے محبت کے اذیت میں بتانے ہیں

مرے ہر زخم کو ہمدم ابھی ناسور ہونا ہے

بڑی لمبی مسافت ہے

تھکن سے چور ہونا ہے

ابھی پلکوں کو چومیں گے تمہاری یاد کے جگنو

تمہارے قرب کی خوشبو تمہاری بات کا جادو

ابھی کچھ بھی نہیں بگڑا

ابھی کچھ بھی نہیں بدلا

ابھی تو سانس کی لے پر ہر اک خواہش مچلتی ہے

ابھی تو موسم ہجراں گماں کی ابتدا میں ہے

ابھی بند قبا میں ہے

ابھی تو ناتمامی کا سمندر پار کرنا ہے

ابھی خود سے الجھنا ہے

ابھی خود سے مکرنا ہے

ابھی ہم راہ رکھنا ہے خسارا سارے جیون کا

شجر دل میں اگانا ہے

زیاں کے زرد ساون کا