KHat-e-rah-guzar

silsile ḳhvāb ke gumnām jazīroñ kī tarah

sīna-e-āb pe haiñ raqs-kunāñ

kaun samjhe ki ye andesha-e-fardā kī fusūñ-kārī hai

maah o ḳhurshīd ne pheñke haiñ ka.ī jaal idhar

tīrgī gesu-e-shab-tār kī zanjīr liye

mere ḳhvāboñ ko jakaḌne ke liye aa.ī hai

ye tilism-e-sahr-o-shām bhalā kyā jaane

kitne dil ḳhuun haiñ añgusht hinā.ī ke liye

kitne dil bujh ga.e jab rū-e-nigārāñ meñ chamak aa.ī hai

ḳhvāb haiñ qaid-e-makāñ qaid-e-zamāñ se aage

kis ko mil saktā hai uḌte hue lamhoñ kā surāġh

kitnī sadiyoñ kī masāfat se ubhartā hai

ḳhat-e-rāh-guzār

silsile KHwab ke gumnam jaziron ki tarah

sina-e-ab pe hain raqs-kunan

kaun samjhe ki ye andesha-e-farda ki fusun-kari hai

mah o KHurshid ne phenke hain kai jal idhar

tirgi gesu-e-shab-tar ki zanjir liye

mere KHwabon ko jakaDne ke liye aai hai

ye tilism-e-sahr-o-sham bhala kya jaane

kitne dil KHun hain angusht hinai ke liye

kitne dil bujh gae jab ru-e-nigaran mein chamak aai hai

KHwab hain qaid-e-makan qaid-e-zaman se aage

kis ko mil sakta hai uDte hue lamhon ka suragh

kitni sadiyon ki masafat se ubharta hai

KHat-e-rah-guzar