کھولتا کیوں نہیں ہے لہو

کتابوں میں میں نے پڑھا تھا

کہ لاکھوں برس قبل

روئے زمیں پر جو حیوان تھے

ان کا خوں سرد تھا

وہ بہت سست رو تھے

کتابوں میں میں نے پڑھا تھا

کہ لاکھوں برس قبل

موسم زمیں کا اچانک جو بدلا

تو ٹھنڈے لہو والے حیوان سارے فنا ہو گئے

اور ان کی جگہ کچھ نئے جانور زندگی کی علامت بنے

خون میں جن کے گرمی ہے

ان میں سے کچھ بولتے بھی سمجھتے بھی ہیں

پر مجھے ایسا محسوس ہوتا ہے

شاید یہ باتیں کتابیں غلط ہیں

جدھر دیکھتا ہوں ادھر خون کی ندیاں بہہ رہی ہیں

جدھر دیکھتا ہوں ادھر ظلم کی آندھیاں چل رہی ہیں

اگر گرم ہے خون انساں تو پھر ظلم پر کھولتا کیوں نہیں ہے

ستم کو ستم جانتا ہے تو پھر بولتا کیوں نہیں ہے