خیالوں خوابوں کا اک نگر تھا

خیالوں خوابوں کا اک نگر تھا

وہیں پہ میرا بھی ایک گھر تھا

اور اس کے دیوار و در کے اندر

مرا جہاں تھا مری کتابیں

میں ان میں کھو کر فسانے سنتی

اور اپنی بھی اک کہانی بنتی

تمہیں سناتی تو دیکھتی میں

تمہاری آنکھوں میں وہ ہی سپنے

جو میری آنکھیں بھی دیکھتی تھیں

سجیلے دن اور نشیلی شامیں

اندھیری راتوں میں میرے دلبر

ہزاروں تاروں کی وہ براتیں

مگر حقیقت یہ ہے کہ خوابوں

کی ہے جو دنیا وہ سچ نہیں ہے

مجھے خبر کیا کہ تم کتابوں

کی بستیوں سے چلے گئے تھے

تمہاری باتوں کو یاد کر کے

ہزاروں خط بھی لکھے تھے میں نے

نہ میں نے سمجھا نہ میں نے جانا

کہ تم تو خوابوں کی اس ڈگر سے

بھی کافی آگے نکل چکے تھے

الجھ رہے تھے خیال سارے

جو خواب تھے سب اجڑ گئے تھے

کتاب دل کے ورق بھی سارے

پھٹے پڑے تھے بکھر گئے تھے

اب اس کی دیوار و در کے اندر

ہے بس اندھیرا ہے بس اندھیرا

خیالوں خوابوں کا اک نگر تھا

وہیں پہ میرا جو ایک گھر تھا