KHazane ka sanp

merī maañ ne mujhe batāyā hai

agle vaqtoñ ke sāhibān-e-duval

jo ḳhudāvand kī mashiyyat se

umr bhar lā-valad rahā karte

ye ajab kār-e-ḳhair farmāte

apnī daulat ko ek bartan meñ

band kar ke kahīñ dabā dete

us pe aaTe yā chiknī miTTī kā

saañp zāmin banā ke rakh dete

taaki ā.inda koī shaḳhs agar

un kī daulat kī samt aañkh uThā.e

ye ḳhazāne kā saañp lahrā kar

us kī aulād bheñT meñ chāhe

log aulād bheñT dete the

aur ye maal khod lete the

merī maañ ne mujhe batāyā hai

mere nā-puḳhta ghar ke āñgan meñ

aisā hī maal dafn thā shāyad

aur ye maal yūñhī dafn rahā

yā kisī aur ghar meñ jā pahuñchā

merī maañ ne mujhe na bheñT diyā

aur vo maal haath se khoyā

merī maañ bhī ajiib aurat hai

apnī maañ se ye vāqi.a sun kar

pahle mujh ko yaqīñ na aatā thā

maiñ ne afsāna us ko samjhā thā

par ye afsāna ik haqīqat thā

par ye afsāna ik haqīqat hai

maiñ ne shādāb khetiyāñ dekhīñ

maiñ ne mill dekhe bañk bhī dekhe

maiñ ne dekhā ki māl-o-daulat ke

har ḳhazāne pe har jagah har pal

ik na ik saañp baiThā rahtā hai

meri man ne mujhe bataya hai

agle waqton ke sahiban-e-duwal

jo KHudawand ki mashiyyat se

umr bhar la-walad raha karte

ye ajab kar-e-KHair farmate

apni daulat ko ek bartan mein

band kar ke kahin daba dete

us pe aaTe ya chikni miTTi ka

sanp zamin bana ke rakh dete

taki aainda koi shaKHs agar

un ki daulat ki samt aankh uThae

ye KHazane ka sanp lahra kar

us ki aulad bhenT mein chahe

log aulad bhenT dete the

aur ye mal khod lete the

meri man ne mujhe bataya hai

mere na-puKHta ghar ke aangan mein

aisa hi mal dafn tha shayad

aur ye mal yunhi dafn raha

ya kisi aur ghar mein ja pahuncha

meri man ne mujhe na bhenT diya

aur wo mal hath se khoya

meri man bhi ajib aurat hai

apni man se ye waqia sun kar

pahle mujh ko yaqin na aata tha

main ne afsana us ko samjha tha

par ye afsana ek haqiqat tha

par ye afsana ek haqiqat hai

main ne shadab khetiyan dekhin

main ne mill dekhe bank bhi dekhe

main ne dekha ki mal-o-daulat ke

har KHazane pe har jagah har pal

ek na ek sanp baiTha rahta hai